BQO-da aýyl ishine kirip ketken qarsaqtan qutyrý aýrýy anyqtaldy
ORAL. KAZINFORM — Batys Qazaqstan oblysy Báıterek aýdany Dostyq aýylynda qarsaqtyń qutyrý dertine shaldyqqany belgili boldy.
BQO veterınarııa basqarmasy basshysynyń orynbasary Nurqaıyr Qusaıynovtyń málim etkenindeı, tamyz aıynda qarsaq aýyldaǵy jeke úıdiń aýlasyna kirip, eki ıtti tistep alǵan.
Nurqaıyr Ǵaınollaulynyń sózine qaraǵanda, sodan keıin úıdiń ıesi qarsaqty óltirip tastap, veterınar dárigerlerge habarlaǵan.
- Qarsaq óleksesinen materıaldar alynyp, veterınarııalyq zerthanaǵa jetkizilip zerttelgen kezde odan qutyrý qozdyrǵyshy tabylǵan. Aýrý qarsaq tistegen ıtter 10 kún baqylaýda ustalyp, keıin ıesiniń ótinishi negizinde jansyzdandyrylǵan. Eki ıt óleksesiniń materıaldary da zertteýden ótkizilip, biraq olardan qutyrý anyqtalmady. Úıdiń aýlasyna shekteý qoıylyp, dezınfektsııalyq is-sharalar júrgizilgen. Bir atap óterlik jaıt, atalǵan turǵyn mal ustamaıdy, - dedi N.Qusaıynov.
Onyń aıtýynsha, veterınarııalyq qaǵıdalarǵa sáıkes aýrý oshaǵyna qoıylǵan shekteý keminde 60 kúnge sozylady. Sol merzim aıaqtalǵannan keıin qorytyndy dezınfektsııa jasalyp, zerthanada sapasy zertteledi. Sodan soń veterınarlyq ınspektordyń usynysymen aýyldyq okrýg ákimimen shekteýdiń alynýy jóninde sheshim qabyldanady.
Buǵan deıin Batys Qazaqstan oblysynda bıyl aýyl sharýashylyǵy janýarlary arasynda 6 asa qaýipti aýrý oshaǵy tirkelgen edi. Atap aıtqanda, ınfektsııalyq rınotraheıttiń 3 (Aqjaıyq aýdanynda Shabdarjap, Atameken jáne Jolap aýyly), iri qara brýtselleziniń 2 (Báıterek aýdany Kóshim aýyly, Terekti aýdany Podstepnoı aýyly) jáne iri qaradan qarasannyń 1 oshaǵy (Terekti aýdany, Saryómir aýyly) anyqtalyp, joıylǵan bolatyn.
Eske sala keteıik, budan buryn BQO-da aýrýdan maly shyǵynǵa ushyraǵan sharýalar ótemaqy ala ma, sony jazǵan edik.
