BQO-da aýyl mektepterindegi oqýshylarǵa arnalǵan Beginit by inDrive baǵdarlamasy bastaldy
Búgin Oralda óńirlik Jaiq Hub-tyń qoldaýymen aýyl mektepterindegi oqýshylarǵa arnalǵan Beginit by inDrive baǵdarlamasy bastaldy, dep habarlaıdy Kazinform.
Óńirdegi joǵary synyptyń júzdegen oqýshysy IT-kompanııa grantyn alý úshin baq synap jatyr. Qazaqstan óńirleriniń jastaryna arnalǵan tegin kóshbasshylyq baǵdarlama BQO-daǵy aýyl balalaryna áleýmettik kóshbasshylyq boıynsha bilim berý kýrsynan ótýge jáne Almatyda ashylatyn ınnovatsııalyq ýnıversıtettiń grant ıegeri atanýǵa múmkindik beredi.
«Oraldan biz oń ózgerister jasaıtyn jańa tulǵalardy taba alatynymyzǵa senimdimiz. Bul mekennen tanymal tulǵalar shyqqany bárimizge aıan. Baǵdarlama aıasynda myqty jastardy kútemiz», - dedi Beginit InDrive jobasynyń jetekshisi Ersaıyn Qabdrashev baspasóz máslıhatynda.
Osyǵan deıin Jambyl oblysynda irikteý bolǵan. Qazaqstan aımaqtaryndaǵy áleýmettik kóshbasshylardy anyqtaýǵa jáne qoldaýǵa baǵyttalǵan Beginit tegin jastar baǵdarlamasy jaqyn arada Qostanaı, Qaraǵandy, Pavlodar jáne Shyǵys Qazaqstan oblystarynda da bastalmaq.
«Jaiq Hub jáne InDrive seriktestigi jastarǵa jańa múmkindikter berýde. Biz birge óńirimizdegi bilim salasyn damytýǵa jáne jas talanttardy qoldaýǵa úlken qadam jasap jatyrmyz. Jyl boıy aýyl mektepteriniń 100-ge jýyq oqýshysy óńirimizdegi áleýmettik máselelerdi sheshý úshin óz jobalaryn jasap, júzege asyrady», - dep bólisti Astana Hub-tyń Batys Qazaqstan oblysyndaǵy óńirlik menedjeri Omarbek Táshim.
Baspasóz máslıhatynan keıin Jaiq Hub, AspanDrone jáne Qazaqstan ınnovatsııalyq jáne telekommýnıkatsııalyq júıeler ýnıversıteti arasynda ózara yntymaqtastyq jáne startap mádenıetin birlesip damytý týraly úshjaqty memorandýmǵa qol qoıyldy.
Dál qazir qaladaǵy irikteý kezeńi bastaldy.
Aıta óteıik, Astana Hub – 2018 jyldyń 6 qarashasynda qurylǵan Ortalyq Azııadaǵy eń iri IT-startaptar tehnoparki. Astana Hub qyzmeti ІT-bıznes úshin ekojúıe qurýǵa, osy saladaǵy talanttardy oqytýǵa jáne startap-jobalardy damytýǵa baǵyttalǵan.
Búgingi tańda 1 317 IT-kompanııa Astana Hub-tyń qatysýshysy sanalady, onyń ishindegi 365-iniń sheteldik úlesi bar.
Al joǵaryda atalǵan inDrive platformasy – AQSh-tyń Kalıfornııa shtaty Maýntın-Vıý óńirinde ornalasqan kólik salasyndaǵy qyzmetterdi kórsetetin jahandyq platforma. InDrive qosymshasyn 175 mıllıonnan astam qoldanýshy júktegen.
