BQO-da «Aýyl – el besigi» baǵdarlamasymen 95 aýyl qamtyldy
ORAL. KAZINFORM — Batys Qazaqstan oblysynda 413 eldi meken bolsa, sonyń 221-i «Aýyl – el besigi» jobasyn iske asyrýǵa múmkindigi bar aýyldar retinde irikteldi.
BQO qarjy basqarmasynyń basshysy Nurlan Esenǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, osynyń ishinde 77-si tirekti, 34-i shekara mańyndaǵy strategııalyq mańyzy bar, 110-y spýtnıktik eldi mekender esebinde belgilendi.
Onyń sózine qaraǵanda, perspektıvti aýyldarda 277 myń adam turady.
«Aýyl – el besigi» jobasy aıasynda 2019-2024 jyldary eldi mekenderdiń áleýmettik jáne ınjenerlik ınfraqurylymyn damytýǵa 150 joba boıynsha 44,1 mlrd teńge baǵyttaldy.
Baǵdarlamamen 281 myń adam (barlyq aýyl turǵyndarynyń 45 paıyzy) turatyn 95 perspektıvti eldi meken qamtyldy. Bularda 24 bilim berý, 20 mádenıet, 10 densaýlyq saqtaý, 3 sport, 13 turǵyn úı-kommýnaldyq sharýashylyq nysany boı kóterip, 7,1 shaqyrym sý qubyry tartyldy. Oǵan qosa 322 shaqyrym jol qatynasy retteldi.
- Bıyl 13,1 mlrd teńgege 30 jobany júzege asyrý kózdelgen bolatyn. Sonyń ishinde 2024 jyldan aýysqan 17 jobanyń 12-sine qarajat qarastyryldy. Respýblıkalyq bıýdjet esebinen áleýmettik-mádenı jáne kólik ınfraqurylymy nysandaryn salý men rekonstrýktsııalaý boıynsha 16 jobaǵa 4,5 mlrd teńge bólindi. Jergilikti qazyna esebinen osyndaı jobalarǵa 8,6 mlrd teńge qaraldy. Kúni búginge deıin 30 jobanyń 11-i máresine jetti. 12 jobany jyl sońyna deıin aıaqtaý josparlanýda. Qalǵan jeteýi kelesi jylǵa aýysady, - dedi N.Esenǵalıev.
Eske sala keteıik, budan buryn óńirler ortalyqqa jaltaqtamaı, óz bıýdjetimen kúnin kóre ala ma, sony jazǵan edik.