BQO-da aýdarylǵan avtokólik 1 tonna balyq ákele jatqan

ORAL. QazAqparat – Batys Qazaqstan oblysynda aýdarylǵan avtokólik 1 tonna balyq ákele jatqan bolyp shyqty, dep habarlaıdy QazAqparat tilshisi.

Budan buryn jazǵanymyzdaı, 21 jastaǵy júrgizýshi «Toyota Land Cruiser Prado» avtokóliginiń rýline ıe bola almaı, «Oral-Atyraý» jolynda aýdarylyp qalǵan bolatyn.

BQO polıtsııa departamentiniń resmı ókili Bolatbek Belgibekovtiń aıtýynsha, qazirgi ýaqytta onyń jaǵdaıy birqalypty, ómirine qaýip joq.

Keıin anyqtalǵandaı, júrgizýshi, Aqjaıyq aýdanynyń turǵyny Oral qalasyna qaraı eshbir qujatsyz 1 tonna 31 kg balyq alyp kele jatqan.

«Balyq saraptamaǵa joldandy. Shyǵyn kólemi anyqtalǵan jaǵdaıda QR QK 196-babyna sáıkes qylmystyq is qozǵalýy múmkin. Sonymen qatar júrgizýshige qatysty QR QK 345-baby 2-bóligine sáıkes qylmystyq is jáne karantın rejımin buzǵany úshin QR Ákimshilik quqyq buzý kodeksi 476-baby 6-tarmaǵyna sáıkes ákimshilik óndiris qozǵaldy», - dedi QazAqparat tilshisine B.Belgibekov.