BQO-da aýdandyq gazettiń bastamasymen jalǵyzbasty áıelge baspana alynyp berildi
ORAL. QazAqparat – Qaztalov aýdany Jalpaqtal aýylynda turatyn Gúlshat Nuǵmanovaǵa aýdandyq gazettiń bastamasymen baspana alynyp berildi, dep habarlaıdy QazAqparat tilshisi.
«Jaıyq Press» JShS Qaztalov aýdandyq «Aýyl aınasy» gazetiniń dırektor-redaktory Qaırat Jaqyptyń aıtýynsha, buǵan gazet tilshisi Juldyz Asqardyń sińirgen eńbegi mol.
Budan buryn da qaıyrymdylyq sharalaryn uıymdastyryp júrgen Juldyz bıylǵy qysta qabyrǵasy qulaǵan qýyqtaı eski úıdi panalap otyrǵan jalǵyzbasty ananyń jaı-kúıimen tanysyp, ony gazet betine jazdy.
Aýdandyq gazettiń aqpan aıynda bastaǵan «Asar» qaıyrymdylyq estafetasy márege jetti. Buǵan respýblıkalyq «Hareket» qaıyrymdylyq qory (dırektory Gúlmıra Muqanqyzy, BQO-daǵy ókili Demejan Meńdeshov) súbeli úles qosyp, 700 myń teńge aýdardy. Sondaı-aq Jalpaqtal aýylynyń jastary shet qalmady.
Barlyǵy 1,3 mln astam teńge jınalyp, jalǵyzbasty anaǵa úsh bólmeli úı alynyp berildi. Oǵan qosa úıdiń ishi sý jańa dúnıelermen qamtyldy.
«Qaqaǵan qysta jylýy joq sýyq úıde búrisip otyrǵan ananyń hali janymyzdy aıazdaı qarydy. Sodan bastap ol kisige úı alyp bersek degen oı týdy. Gúlshat apaıdyń bir qyzy turmysta, múgedek eki balasymen turady. Qaıyrymdylyq estafetasy kezinde jalpaqtaldyq jastar Bolatbek Sarmanov pen ustaz Ardaq Jangeldi bastan-aıaq janymda boldy. Mine, osyndaı qaıyrymdy jandardyń birlese qımyldaýy nátıjesinde qasıetti Ramazan aıynda jalǵyzbasty anaǵa baspana alyp berdik. Gúlshat apaıdyń qolushyn sozǵan barsha azamattarǵa alǵysy sheksiz», deıdi Juldyz Asqar.
