BQO-da aýdandyq bilim bóliminiń basshysy noýtbýkke bólingen 6,5 mln teńgeni qoldy etken - agenttik

NUR-SULTAN. QazAqparat – Batys Qazaqstanda aýdandardyń biriniń bilim bóliminiń basshysy noýtbýk satyp alý úshin bólingen 6,5 mln teńge jymqyrǵan. Laýazymdy qyzmetkerdiń mundaı kúdikke ilingenin onlaın baspasóz máslıhatynda Sybaılas jemqorlyqqa qarsy is-qımyl agenttigi Preventsııa departamentiniń asa mańyzdy ister jónindegi ofıtseri Aınagúl Káripova málim etti, dep habarlaıdy QazAqparat tilshisi.

«Búginde bıýdjet qarajatyn jymqyrǵany úshin laýazymdy tulǵalardy jaýapqa tartýdyń mysaldary bar. Qylmystyq is júrgizýdiń bastalýyna «Satyp alýdyń biryńǵaı terezesi» portaly arqyly memlekettik satyp alýdyń sybaılas jemqorlyqqa qarsy monıtorıngi nátıjeleri negiz boldy. Máselen, BQO-da aýdannyń bilim berý bóliminiń basshysy noýtbýkterdi arnaıy tártipte joǵary baǵamen satyp alǵan kezde 6,5 mln teńge jymqyrdy degen kúdikke ilindi», - dedi ol.

Aıta ketsek, buǵan deıin Aınagúl Káripova agenttiktiń qashyqtan oqytýdy uıymdastyrý úshin kerekti noýtbýkter men planshetterge, kompıýterlerge 70 mlrd teńgeniń bólinýine taldaý júrgizgenin habarlaǵan bolatyn. Agenttiktiń qatysýymen jumys toptary, qoǵamdyq komıssııalar satyp alynatyn uıymdastyrý tehnıkasynyń baǵasyn tómendetip, 3 mlrd teńge únemdegen.