BQO-da aýdan ákimdiginde tóbeles bolyp, bir adam aýyr jaraqat aldy

ORAL. KAZINFORM – Syrym aýdany ákimdigi ǵımaratynda oqys oqıǵa boldy.

Turǵyndardyń sózine qaraǵanda, aýdan ákimdiginiń kúzetshisi naýryzdyń 14-inen 15-ine qaraǵan túni ákimdik ǵımaratynyń ishinde eki er adam jáne áıelmen birge spırttik ishimdik ishken.

Sodan er adam men kúzetshiniń arasynda janjal týyndaǵan. Er adam kúzetshini uryp-soǵyp, esinen tandyryp, ǵımarattyń syrtyna shyǵaryp tastap ketken.

Týystarynyń aıtýynsha, jábirlenýshi es-tússiz kúıinde syrtta tańǵa deıin jatyp qalǵan, jaǵdaıy óte aýyr, basyna zaqym kelgen.

BQO Polıtsııa departamenti baspasóz qyzmetiniń málim etkenindeı, densaýlyqqa qasaqana aýyr zııan keltirý deregi boıynsha 1981 jylǵy er adamǵa qatysty qylmystyq is qozǵaldy.

- Kúdikti ýaqytsha ustaý ızolıatoryna qamaldy. Oqıǵanyń barlyq qatysýshysy men kýágerleri anyqtalyp, olardan jaýap alyndy. Tergeý barysy baqylaýda, - dep habarlady vedomstvodan.

BQO Densaýlyq saqtaý basqarmasy baspasóz qyzmetiniń naqtylaýynsha, osy oqıǵa boıynsha Oral qalasynan sanavıatsııa shaqyrtyldy. Jábirlenýshige shuǵyl ota jasaldy. Keıin ol qalalyq kópbeıindi aýrýhanaǵa jetkizildi.

Eske sala keteıik, budan buryn BQO-da aýyl turǵyny úıinde esirtki zerthanasyn jasaǵanyn jazǵan bolatynbyz.