BQO-da aýdan ákiminiń orynbasary qyzmettik kóligimen monshaǵa barǵan

ORAL. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha ádep keńesiniń kezekti otyrysynda birneshe laýazymdy qyzmetkerdiń tártiptik isi qaraldy, dep habarlaıdy QazAqparat tilshisi.

Ádep keńesi hatshylyǵynan túsken málimetke qaraǵanda, aldymen qyzmettik avtokóligin qyzmetten tys ýaqytta, jeke maqsatta paıdalanǵan Jańaqala aýdany ákiminiń orynbasary Jasulan Nurǵojınniń isi talqyǵa salyndy.

Atap aıtqanda, J.Nurǵojın 7 sáýir, jeksenbi kúni keshkisin qyzmettik kóligimen monshaǵa barǵan. Muny «Facebook» áleýmettik jelisiniń qoldanýshysy vıdeoǵa túsirip, óz paraqshasyna jarııalaǵannan keıin másele qyzý talqylanǵan bolatyn.

Ádep kodeksi talaptaryn saqtamaǵany úshin J.Nurǵojınge qyzmetine tolyq sáıkes emestigi týraly eskertý túrindegi tártiptik jaza qoldaný jóninde Jańaqala aýdany ákimine usynys jasaldy.

Sol sekildi Jańaqala aýdandyq bilim berý bóliminiń basshysy Eljas Qadyrovtyń qyzmettik avtokóligin onyń otbasy músheleri jeke maqsatta paıdalanǵany jóninde de áleýmettik jeli arqyly taralǵan bolatyn.

Osynyń aldynda avtokólikke tıisinshe baqylaý júrgizbegeni úshin aýdan ákiminiń ókimimen E.Qadyrovqa qatań sógis túrindegi jaza berilgeni eskerilip, bul isti toqtatý jóninde sheshim qabyldandy.

Terekti aýdany Shaǵan aýyldyq okrýginiń ákimi Jandos Nyǵmetov ádep qaǵıdalaryn saqtamaı, qaraýyndaǵy qyzmetkerge daýys kótergen. Degenmen ol kelesi kúni okrýg ákimi apparaty qyzmetkerlerinen keshirim suraǵan.

Bul laýazymdy qyzmetkerge de sáýir aıynda eskertý túrindegi jaza qoldanylǵany eskerilip, tártiptik is toqtatyldy.