BQO-da aýa raıyna baılanysty taǵy da eskertý jarııalandy
ORAL. QazAqparat - «Qazgıdromet» RMK BQO fılıalynyń málimetine qaraǵanda, 19-21 aqpan kúnderi óńirdiń keı jerlerinde qar jaýyp, burqasyn kóterilip, ońtústik-batystan soǵatyn jeldiń jyldamdyǵy sekýndyna 15-20, ekpini 23 metrge jetpek, dep habarlaıdy «QazAqparat» HAA tilshisi.
Oral qalasynda da qar jaýyp, burqasyndatyp, jel kúsheıedi. Osyǵan oraı BQO TJ departamenti eskertý jarııalady. Oblys aýmaǵynda turǵyndar arasynda tótenshe jaǵdaılarǵa jol bermeý maqsatynda tıisti sharalar alynýda.
Aıta keteıik, óńirde bıyl qys qarly, borandy bolyp tur. Budan buryn osy aqpan aıynyń ózinde 2-3, 5 jáne 15-16 aqpan kúnderi aýa raıy buzylatyny jóninde aldyn ala eskertilgen edi. Ókinishke qaraı, adam ólimine soqtyrǵan oqıǵalar da kezdesti. 1 aqpan kúni Aqjaıyq aýdanynda bir jáne 16 aqpanda Qaratóbede dalada úsip ketken eki adamnyń múrdeleri tabyldy.
