BQO-da aýa raıyna baılanysty respýblıkalyq jol jabyldy

ORAL. QazAqparat – Batys Qazaqstan oblysynda aýa raıynyń nasharlaýyna baılanysty respýblıkalyq jol jabyldy, dep habarlaıdy QazAqparat tilshisi.

«Qazavtojol» JShS BQO fılıalynyń málimeti boıynsha 3 aqpan kúni jergilikti saǵat 12.30-dan bastap respýblıkalyq mańyzy bar Oral-Tasqala-RF shekarasy (76-104 km, Tasqaladan Reseı shekarasyna deıin) jolynda barlyq kólik túrleri úshin qozǵalysqa shekteý qoıyldy.

Atalmysh aralyqta kúshti jel saldarynan burqasyn kóterilip, joldyń kórinýin qıyndatyp tur.

«Qazgıdromet» RMK málimeti boıynsha budan buryn 3 aqpan kúni oblystyń keı jerlerinde kóktaıǵaq bolyp, tuman túsip, jeldiń kúsheıetini habarlanǵan bolatyn.

Osyǵan baılanysty BQO TJ departamenti eskertý jarııalap, turǵyndarǵa abaı bolý qajettigin jetkizdi.

Eske sala keteıik, budan buryn Batys Qazaqstanda aýa raıy buzylyp, respýblıkalyq jolda qozǵalysqa shekteý qoıylǵanyn jazǵan bolatynbyz.