BQO-da aýa raıyna baılanysty eki respýblıkalyq jol jabyldy

ORAL. QazAqparat - Batys Qazaqstan oblysynda aýa raıynyń nasharlaýyna baılanysty eki respýblıkalyq jol jabyldy, dep habarlaıdy QazAqparat tilshisi.

«QazAvtoJol» JShS BQO fılıalynyń málimetine qaraǵanda, 16 jeltoqsan kúni saǵat 14.00-den bastap respýblıkalyq mańyzy bar Samara-Shymkent jolynda (266-480 km, Terekti aýdany Podstepnyı aýylynan Qaratóbeniń Qoskóline deıin) barlyq kólik túrleri úshin qozǵalysqa shekteý qoıyldy.

Sondaı-aq respýblıkalyq mańyzy bar Oral-Atyraý joly da (492-227 km, Oraldan Taıpaq aýylyna deıin) jabyq.

Jabylý sebebi - jańbyr, kóktaıǵaq.

Osyǵan baılanysty BQO TJ departamenti eskertý jarııalanǵanyn jetkizip, qolaısyz aýa raıy kezinde alys jolǵa shyqpaý kerektigin eske salady.