BQO-da aýa raıynyń kúrt buzylýyna baılanysty birneshe jol jabyldy

Batys Qazaqstan oblysynda aýa raıynyń buzylýyna baılanysty (kóktaıǵaq, jel, jańbyr, temperatýranyń tómendeýi) baılanysty birneshe jol jabyldy, dep habarlaıdy Kazinform.

«QazAvtoJol» UK» AQ BQO fılıalynyń málimeti boıynsha, 3 jeltoqsan kúni saǵat 20.00-den bastap respýblıkalyq mańyzy bar Atyraý-Oral (189-492 km, Atyraý oblysynyń shekarasynan Oral qalasyna deıin) jáne Oral-Tasqala-RF shekarasy (4-104 km, Oraldan Reseı shekarasyna deıin) joldarynda barlyq kólik túrleri úshin shekteý qoıyldy.

Sondaı-aq saǵat 21.00-den bastap respýblıkalyq mańyzy bar Samara-Shymkent jolynyń eki bóliginde (195-247 km, RF shekarasynan Makarov aýylyndaǵy MAI beketine deıin) jáne (262-526 km, Terekti aýdany Podstepnyı aýylynan Aqtóbe oblysy shekarasyna deıin) jol jabyldy.

BQO jolaýshylar kóligi jáne avtomobıl joldary basqarmasynyń málimetine qaraǵanda, saǵat 21.40-tan bastap oblystyq mańyzy bar Tasqala-Aqqýraı-Bolashaq (0-157 km, Tasqaladan Bolashaq aýylyna deıin), Úlken Shaǵan-Peremetnyı (0-42 km, Úlken Shaǵannan Peremetnyıǵa deıin) jáne Chapaev-Jańaqala-Saıqyn (0-130 km, Chapaevtan Jańaqala aýylyna deıin) joldarynda barlyq kólik túri úshin shekteý engizildi.

BQO TJ departamenti osyǵan baılanysty turǵyndarǵa tótenshe jaǵdaıdyń aldyn alý úshin saq bolý kerektigin eske salady.

Qazir Oral qalasy kóshelerinde de kóktaıǵaq bolyp tur.