BQO-da Atyraýdan kelgen jumysshydan koronavırýs tabyldy
ORAL. QazAqparat – Batys Qazaqstan oblysynda koronavırýs juqtyrǵan sońǵy naýqas Atyraýdan kelgen, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń aıtýynsha, 30 jastaǵy oblys turǵyny Atyraý óńirinde vahtalyq ádispen jumys istegen.
Ol Atyraýdan jeke kóligimen jalǵyz ózi kelgen. Sodan keıin úıinde oqshaýlanyp, koronavırýs juqpasyna synama alynǵan kezde COVID-16 dıagnozy naqtylandy.
Qazirgi tańda oblystyq juqpaly aýrýlar aýrýhanasynda jatqan naýqastyń jaǵdaıy qanaǵattanarlyq. Onymen qarym-qatynasta bolǵan adamdar anyqtalyp, medıtsınalyq baqylaýǵa alyndy.
Aýrý oshaǵynda epıdzertteý jáne dezınfektsııalyq jumystar júrgizildi.
Osylaısha BQO-da aýyrǵandar sany 126-ǵa jetip, sonyń jeteýi jazylyp shyqty.
«Kúni búgin 13 adam provızorlyq, 361 adam karantındik statsıonarda jatyr. Munyń sebebi keshe túnde Atyraý oblysyndaǵy Teńiz kenishinen kelgen jumysshylar Aqjaıyq aýdany men Oral qalasyndaǵy karantındik statsıonarǵa eki kúnge jatqyzyldy. Eger aýrý anyqtalmasa, úılerine oqshaýlanýǵa jiberiledi. Oǵan qosa oblysta 1653 adam úılerinde medıtsına qyzmetkerlerimen baqylanýda», dedi M.Aryspaev.
Eske sala keteıik, budan buryn BQO-da Reseıden kelgen Túrkistan oblysynyń úsh turǵynynan koronavırýs tabylǵanyn jazǵan bolatynbyz.
