BQO-da atyp alynǵan 34 bas kıik tabyldy
ORAL. QazAqparat - Batys Qazaqstan oblysynda atyp alynǵan kıikterdiń 34 basy tabyldy, dep habarlaıdy «QazAqparat» HAA tilshisi.
QR AShM Orman sharýashylyǵy jáne janýarlar dúnıesi komıteti oblystyq ınspektsııasynyń basshysy Qaırat Qadeshevtiń aıtýynsha, 30 jeltoqsan kúni Jańaqala aýdany aýmaǵynan 14 kıiktiń tutas denesi tabyldy. Brakonerler onyń jartysynyń múıizin kesip úlgergen de, qalǵanyn solaı tastap ketken. Sol sekildi 4 qańtar kúni Bókeı ordasy aýdanynan atyp alynǵan taǵy 20 kıik tabyldy.
«Jeltoqsan aıynda aıaqtalǵan kúıek naýqanynan keıin kıikter ábden álsiregen. Sondyqtan bylaı shyǵyny da joq emes. Onyń ústine qardyń bir erip, qaıta qatýynan keıin tebindeı almaǵan janýarlar Qaztalov, Jánibek, Jańaqala, Bókeı ordasy aýdandaryna qaraı oıysýda. Bul olardy baqylaý jumysyn qıyndata túsýde. Qarshananyń jetkiliksizdiginen brakonerlerge tosqaýyl qoıý da qıyn. Degenmen «Ohotzooprom» óndiristik birlestigi fılıalymen birlese otyryp, jergilikti atqarýshy bıliktiń kómegimen kıikti barynsha qorǵaý sharalary alynýda», dedi «QazAqparat» tilshisine Q.Qadeshev.
«Kúni búgin Jańaqala aýdany aýmaǵynda 20 myńdaı kıik bar. Bókeı ordasyna da az kirmegen. Sezgish janýar sanalatyn kıikterdiń bulaı oıysýy tegin emes. Muzdaq bolyp, qystyń aıaǵy sozylyp ketse, jylqyǵa da qaýip tónýi ábden yqtımal», - dedi Jańaqala aýdanynyń ákimi Lavr Haıretdınov.
Eske sala keteıik, qazirgi tańda Qazaqstanda kıik eń kóp taralǵan aýmaq Batys Qazaqstan oblysy bolyp otyr. Ótken jylǵy kóktemde óńirde 70200 kıik sanaqqa ilikken bolatyn.
