BQO-da atmosferalyq aýaǵa shyǵarylǵan zııandy zattar 2 eseden asty

ORAL. KAZINFORM – Batys Qazaqstan oblysynda ótken jyly atmosferalyq aýaǵa 84,04 myń tonna lastaýshy zattar shyǵaryldy.

BQO boıynsha Ekologııa departamentiniń basshysy Murat Ermekqalıevtiń málim etkenindeı, bul aldyńǵy jylmen (40,69 myń tonna) salystyrǵanda, eki eseden artyq.

Onyń sózine qaraǵanda, bul «Intergaz Ortalyq Azııa» AQ «Oral» magıstraldyq gaz qubyrlary basqarmasy shyǵaryndylarynyń kóbeıýine baılanysty bolyp otyr.

- Ótken jyly «Oral» magıstraldyq gaz qubyrlary basqarmasy Jańaqala aýdany aýmaǵynda tranzıttik qubyrǵa úlken kólemde jóndeý jumystaryn júrgizdi. Sol sebepti atalǵan kásiporyn jergilikti atqarýshy organnan atmosferalyq aýaǵa 60 myń tonna zattar shyǵarýǵa lımıt surap, ruqsatyn aldy. Sonyń nátıjesinde shyǵaryndy kólemi 48 myń tonnadan asty. Bul 2024 jylǵymen salystyrǵanda, 41,34 myńǵa ósti, - dedi M.Ermekqalıev.

Onyń aıtýynsha, atmosferalyq aýaǵa shyǵarylatyn zııandy zattardyń barlyq shyǵaryndynyń 72,45 paıyzy (60,88 myń tonna) munaı-gaz kásiporyndaryna tıesili. Sonyń ishinde 7,56 paıyzy – «QPO b.v.» kompanııasy, 4,6 paıyzy – «Jaıyqmunaı» JShS, 2,7 paıyzy – «Kondensat» AQ, 57,61 paıyzy «Oral» magıstraldyq gaz qubyry basqarmasynyń úlesine tıedi.

Bul rette departament ruqsatyn beretin birinshi sanattaǵy kásiporyndarǵa 19,1 myń tonna (2024 jyly – 17,8 myń tonna) lastaýshy zattar tıesili, ıaǵnı bul tek 1,3 myń tonnaǵa ǵana ósken.

- 2025 jyly Batys Qazaqstan oblysynda atmosferanyń joǵary lastanýy jáne ekstremaldy derekter tirkelgen joq, - dep qosty departament basshysy.

Eske sala keteıik, budan buryn Oral men Aqsaıda qatty turmystyq qaldyqtar polıgony nelikten salynbaı otyrǵanyn jazǵan edik.