BQO-da ataýly áleýmettik kómek alatyndardyń 49 paıyzy — kópbalaly otbasylar
ORAL. KAZINFORM — Batys Qazaqstan oblysynda bıylǵy birinshi toqsanda barlyq qarjylandyrý kózinen 11 719 otbasyna 724,9 mln teńgege áleýmettik kómek kórsetildi.
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Jaqsylyq Abdolovtyń óńirlik kommýnıkatsııalar qyzmeti alańynda ótken brıfıngte málim etkenindeı, bul — ataýly áleýmettik kómek (AÁK), turǵyn úı kómegi. Sondaı-aq úıde oqıtyn múgedektigi bar balalardyń shyǵyndaryn óteýge, azamattardyń jekelegen sanattaryna ataýly jáne merekelik kúnderge, ómirlik qıyn jaǵdaıǵa tap bolǵanda jáne basqa da qosymsha járdem beriledi.
Jaqsylyq Kárımollaulynyń sózine qaraǵanda, 798 otbasyna, sonyń ishinde 4 167 adamǵa 110,9 mln teńgege AÁK kórsetildi. Osy kómekti alýshylardyń 49 paıyzy nemese 393-i — kópbalaly otbasy.
— AÁK alýshy otbasylaryndaǵy 1-den 6 jasty qosa alǵandaǵy 1 264 balaǵa aı saıynǵy qosymsha tólemder tólendi. Byltyrǵy jylmen salystyrǵanda, ataýly áleýmettik kómek alýshy otbasylar sany 6,3 paıyzǵa tómendedi. Oblys boıynsha 52 aýyldyq okrýgte ataýly áleýmettik kómek alýshylar joq, — dedi J.Abdolov.
Onyń aıtýynsha, QR Úkimetiniń 2023 jylǵy 30 maýsymdaǵy «Áleýmettik kómek kórsetýdiń, onyń mólsherlerin belgileýdiń jáne muqtaj azamattardyń jekelegen sanattarynyń tizbesin aıqyndaýdyń úlgilik qaǵıdalaryn bekitý týraly» № 523 qaýlysy negizinde jasaqtalǵan qalalyq jáne aýdandyq máslıhattardyń sheshimderine sáıkes áleýmettik kómek kórsetý qarastyrylǵan.
Sheshimderge sáıkes ataýly jáne merekelik kúnderge oraı kómek alýshylar qataryna «Ardagerler týraly» QR Zańymen anyqtalǵan sanattar boıynsha ekinshi dúnıejúzilik soǵys ardagerleri, solarǵa teńestirilgender, ózge memleketterdiń aýmaǵyndaǵy urys qımyldaryna qatysqandar, áleýmettik máni bar aýrýlarmen aýyratyn, múgedektigi bar adamdar jáne basqalar kiredi.
Bıylǵy úsh aıda jekelegen sanattar boıynsha 10 838 adamǵa 575,8 mln teńgege áleýmettik kómek kórsetildi.
— Sonymen qatar 1 sáýirge deıin 322 otbasyna 6 mln teńgege turǵyn úı kómegi berilse, sonyń 226-sy (3,5 mln teńge) Oral qalasynyń úlesine tıedi. Turǵyn úı kómegin alýshylardyń 70 paıyzy — qala turǵyndary. Mundaı járdem alýshylardyń ishinde zeınetkerler — 63 paıyz, jaldamaly jumys jasaıtyndar — 6,5, múgedektigi bar adamdar –14, jumyssyzdar — 3,4, az qamtylǵandar jáne basqa sanattaǵylar — 13,1 paıyz, — dep qosty basqarma basshysynyń orynbasary.
Eske sala keteıik, budan buryn Batys Qazaqstanda 24 500-den astam adamnyń jumyspen qamtylǵanyn jazǵan bolatynbyz.
