BQO-da ata-anasynyń bas tartýyna baılanysty myńnan astam bala egilmeı otyr
ORAL. QazAqparat - Batys Qazaqstan oblysynda túrli sebeptermen ata-anasynyń bas tartýyna baılanysty 1072 bala egilmeı otyr. Bul týraly óńirlik kommýnıkatsııalar qyzmetinde oblystyq qoǵamdyq densaýlyq saqtaý departamentiniń basshysy Jaıdar Qurmanov málim etti, dep habarlaıdy QazAqparat tilshisi.
Onyń aıtýynsha, júrgizilgen túsinik jumystary nátıjesinde buryn bas tartqan 100 ata-ana perzentterine ekpe alýdy jalǵastyrdy.
Medıtsına qyzmetkerlerine senbeý jáne dinı nanym-senimge súıenip, ekpe ektirmeýdiń sońy juqpaly aýrýlardyń taralýyna ákelýi múmkin. Mysaly, 1995 jyly aldyn ala egilmeýdiń saldarynan elimizde 1105 adam dıfterııaǵa shaldyǵyp, sonyń 66-sy kóz jumdy.
Ulttyq egý kúntizbesine sáıkes, 17 juqpaly aýrýǵa (dıfterııa, sirespe, týberkýlez, V gepatıti, pnevmokokk, polıomelıt, qyzylsha, qyzamyq jáne basqalar) qarsy turǵyndardy egýge respýblıkalyq bıýdjetten qarjy bólinedi.
Aıta keteıik, bıylǵy birinshi jartyjyldyqtyń qorytyndysy boıynsha oblysta epıdemıologııalyq jaǵdaı qalypty deýge bolady, kóptegen juqpaly aýrýlardyń tómendegeni jáne turaqtylyǵy baıqaldy. Oba, tyrysqaq, qutyrý, túıneme, týlıaremııa, ish súzegi, sal, dıfterııa, sirespe, qyzylsha, qyzamyq aýrýlary tirkelgen joq.
