BQO-da ata-analyq quqyǵynan aıyrylǵandar sany artty
ORAL. QazAqparat - Batys Qazaqstan oblysynda ata-analyq quqyǵynan aıyrylǵandar sany artyp otyr, dep habarlaıdy «QazAqparat» tilshisi.
BQO kámeletke tolmaǵandar isteri jónindegi mamandandyrylǵan aýdanaralyq sotynyń sýdıasy Janar Eshpanovanyń aıtýynsha, 2016 jyly ata-analyq quqyǵynan aıyrý týraly 57 is aıaqtalyp, sonyń 42-si qanaǵattandyrylǵan.
Ótken jyly 76 is qaralyp, sonyń 50-i boıynsha ata-analyq quqyǵynan aıyrý týraly sheshim qabyldanǵan. Osylaısha aıaqtalǵan ister sany 25 paıyzǵa artty. Talap aryzdy qanaǵattandyrýǵa analardyń perzenthanadan nemese balalar úıinen óz sábıin baýyryna alýdan bas tartýy, sondaı-aq ata-analardyń ishimdikke salynýy jáne alıment tóleýden jaltarýy negiz bolyp otyr.
Qalalyq bilim berý bóliminiń ókili Baqytgúl Berdeńǵorova bala tárbıesimen durys aınalyspaıtyn qolaısyz otbasylarmen jumys udaıy júrgiziletinin jetkizdi. Bul rette, ásirese, turǵylyqty mekenjaıy joq, qańǵyp júretin ata-analardy izdestirý erekshe qıyndyq týǵyzady. Sondyqtan osy oraıda múddeli uıymdardyń birlesip is tyndyrǵany áldeqaıda tıimdi.
