BQO-da at sporty mektebiniń jastary tý kóterip shyqty
Saıqyn aýylynda at sporty mektebiniń ashylý rásiminde tý kóterip, aýlany aınalǵan jastar merekege erekshe reń berdi.
Osylaısha olar elimizde keń kólemde ótip jatqan «Meniń týym – meniń Otanym!» is-sharasyna qosyldy.
Táýelsizdik merekesine oraı ótken mekteptiń ashylý rásiminde aýdan ákimi Nurlan Rahymjanov babalarymyzdyń keń baıtaq qazaq jerin at ústinde júrip qorǵap qalǵanyn, baıyrǵy turmys-saltymyz osy ónerge baılanysty ekendigin jetkizdi.
«Jas urpaq tól dástúrimizge adaldyq tanytyp, ulttyq sport túrlerimen dendep aınalyssa, olardyń rýhy myqty, aıbyny asqaq bolary anyq», dedi aýdan basshysy.
Aýdandyq balalar-jasóspirimder sport mektebiniń dırektory Dmıtrıı Semılıdıdiń aıtýynsha, teńge alý, aýdaryspaq, jamby atý, kókpar sekildi ulttyq oıyndarǵa baýlıtyn úıirmelerge ázirge 25 bala qabyldandy. Meıramnan keıin olardyń qatary 30-ǵa jetpek. At sporty mektebinde segiz adam jumys isteıdi. Taǵy bir bilikti jattyqtyrýshyny qyzmetke alý josparlanýda. Jylqy sany da kóbeıedi.
«Bizdiń sport mektebiniń ashylǵanyna bıyl 35 jyl tolady. Ózim de osynshama ýaqyt boıy basshylyq etip kelemin. Týyp-ósken jerimiz tarıhı Bókeı ordasy aýdany, Saıqyn aýyly bolǵandyqtan, osy óńirdiń mártebesin kóterip, abyroıyn asyrý – basty muratymyz. Jýyrda aýdanymyzda jańadan dene shynyqtyrý-saýyqtyrý kesheni ashylmaqshy. Munyń bári turǵyndardyń, ásirese, jastarymyzdyń sportpen dendep aınalysyp, denderi saý bolyp, elimizdiń damýyna óz úlesterin qosýǵa septigin tıgizetini haq», dedi QazAqparat tilshisine ulty grek bolsa da, ózin qazaq sezinetin Dmıtrıı Semılıdı.
