BQO-da asfaltbeton jáne kirpish óndiretin zaýyttar salynady

ORAL. QazAqparat – Batys Qazaqstan oblysynda asfaltbeton jáne kirpish óndiretin zaýyttar salý kózdelip otyr. Bul týraly oblys ákimi Ǵalı Esqalıevtiń tóraǵalyǵymen ótken ınvestıtsııalar tartý boıynsha ótken keńes otyrysynda málim boldy, dep habarlaıdy QazAqparat tilshisi.

«Aqjaiyq» ÁKK« UK» AQ basqarma tóraǵasy Nádir Qurymbaevtyń aıtýynsha, óńirde barlyǵy 49 ınvestıtsııalyq joba júzege asyrylýda jáne josparlanýda.

Aldaǵy jyly óńir úshin asa mańyzdy birqatar jobalar qolǵa alynbaqshy. Mysaly, qazirgi tańda Bórli aýdany Pepel aýylynda asfaltbeton zaýyty úshin jabdyqtar tańdalýda. Shıkizat jetkizý úshin temirjol tuıyqtary qurylysy da qarastyrylýda. Investıtsııa quny – 1,4 mlrd teńge. Jylyna 135 myń tonna asfaltbeton óndire alatyn zaýytty «AdalArna Almaty» JShS 2021 jyldyń sońyna deıin iske qosýdy kózdep otyr.

Sol sekildi «West group» JShS Oral qalasy mańynan jylyna 15 mln dana keramıkalyq kirpish óndiretin zaýyt qurylysyn aldaǵy jyldyń aıaǵyna deıin salyp bitirmekshi. Joba quny – 3 mlrd teńge.

Aýyl sharýashylyǵy salasynda da birqatar iri jobalar júzege asyrylmaqshy. «Beles-Agro» JShS 2021 jyly quny 3 mlrd teńge turatyn kókónis ónimderin saqtaıtyn kóterme saýda-taratý ortalyǵyn iske qospaqshy.

«KazMeatlndustry» JShS Syrym aýdanynda analyq basy 5 myńǵa jetetin Romanov tuqymdas qoı ósirmekshi. Investıtsııa kólemi – 1,7 mlrd teńge.

«Tasqala qus fabrıkasy» JShS Tasqala aýdanynda 90 myń bas ınkýbatorymen birge 20 myńǵa deıin túrli qus ustaıtyn fabrıkany (joba quny – 750 mln teńge) jolǵa qoımaqshy.

«World Green Company» JShS 4400 tonna qııar men 3450 tonna tomat óndiretin jylyjaı keshenin salmaqshy. Buǵan 10,5 mlrd teńge qarjy salynyp, keshen iske qosylǵanda, 160 adam jumyspen qamtylmaqshy.

N.Qurymbaev sonymen qatar bıyl jyl sońyna deıin márege jetetin jobalardyń da bar ekenin jetkizdi. Aqsaı qalasynda «Green Spark Limited» JShS kún panelin shyǵara bastamaqshy. Jylyna 50 myń danaǵa deıin kún panelin óndiretin jobaǵa ınvestor 840 mln teńgesin salyp, 100 jumys ornyn ashty.

Sondaı-aq oblysta jýyq arada eki kókónis qoımasy iske qosylmaqshy. Onyń biri Báıterek aýdany ıAnvartsev aýyldyq okrýgi Kırsanov eldi mekeninde oryn tepken. «Baystone» JShS 1,1 mlrd teńgege salyp jatqan qoımada 4 myń tonna ónimdi saqtaýǵa bolady. Al Rýbejın aýyldyq okrýginde «Rýbejınskıı» kásiporny ónimdi saqtap qana qoımaı, ony óńdeıtin qoımany ashpaqshy.

Oblys ákimi Ǵalı Esqalıev ınvestıtsııalar tartyp, óńir úshin mańyzy zor jobalardy ýaqtyly júzege asyrý qajettigin atap kórsetip, naqty tapsyrmalar berdi.