BQO-da arnaıy qyzmetti sebepsiz shaqyrtqan 12 turǵyn jaýapqa tartyldy
ORAL. QazAqparat - Oblys aýmaǵynda jyl basynan beri arnaıy qyzmetti sebepsiz shaqyrtqany úshin 12 turǵyn QR Ákimshilik quqyqbuzýshylyq kodeksi 438-baby 1-bólimine sáıkes jaýapqa tartyldy, dep habarlaıdy «QazAqparat» tilshisi.
BQO ІІD baspasóz qyzmetinen túsken málimetke qaraǵanda, óz isiniń baıybyna barmaı, týysqandary men kórshilerine «qaljyńdaý» úshin nemese mas kúıinde esh sebepsiz telefon shalatyndar az emes. Mysaly, 13 sáýir kúni saǵat 21.35 shamasynda Oralda turatyn A. degen áıel jalǵan aty-jónin aıtyp, «El yrysy» bazary mańynda eki júk kóliginiń Reseıdiń Samara qalasyna qaraı esirtki zattaryn alyp bara jatqanyn habarlaǵan. Tekserý jumystaryn júrgizgen kezde júk kóligi júrgizýshisiniń atalǵan áıeldiń azamattyq nekedegi zaıyby ekendigi, ózin Samaraǵa alyp ketpegeni úshin jalǵan habarlaǵany anyqtaldy. Osylaı, A. ákimshilik jaýapkershilikke tartylyp, oǵan 30 AEK (68070 teńge) kóleminde aıyppul salyndy. Sol sekildi 15 mamyr kúni saǵat 22.20-da Oral qalasynyń A. degen turǵyny óziniń «VAZ Prıora» avtokóliginiń aıdap áketilgenin habarlaǵan. Sóıtse, ol bul avtokólikti 2015 jyldyń kúzinde satyp jibergen. Jalǵan shaqyrtý kezinde ózi mas bolǵan bul azamat ta ákimshilik jaýapkershilikke tartyldy.
