BQO-da «Arqan» mobıldi kesheni 20 kúnde 84 avtokólikti «arqandady»
ORAL. QazAqparat – Batys Qazaqstan oblysynda «Arqan» mobıldi kesheni jumys jasaı bastaǵannan bergi 20 kún ishinde 84 avtokólik ustaldy, dep habarlaıdy QazAqparattilshisi.
BQO polıtsııa departamentiniń bastyǵy mindetin atqarýshy Janbolat Janshınniń aıtýynsha, atalǵan keshender 19 tamyzdan bastap iske kirisken edi.
Sodan beri ustalǵan 84 avtokólikke sot oryndaýshylary 46,4 mln astam teńge kóleminde tyıym saldy.
Sonymen qatar quqyq buzýshylarǵa 7,263 mln teńgeniń 164 uıǵarymy avtomatty túrde jiberildi.
J.Janshınniń sózine qaraǵanda, munyń tıimdiligi sol, «Arqan» mobıldi kesheni sol aýmaqtan ótip jatqan kólikterdiń qozǵalysyn polıtsııa qyzmetkeriniń qatysýynsyz, avtomatty túrde baqylap otyrady. Ol nómirlik belgilerdi, shekteý qoıylǵan, aıdap áketilgen, ıeleriniń qaryzy bar avtokólikterdi, sondaı-aq belgilengen jyldamdyqty arttyrý deregin anyqtaıdy.
Derekter men beıneaqparat mobıldi baılanystyń kómegimen sol boıda aıyppul salý men ony tóleý jóninde uıǵarym berý úshin polıtsııanyń derekterdi jasaqtaý ortalyǵyna jiberiledi. Bul, ekinshi jaǵynan, sybaılas jemqorlyq táýekelin tómendetýge septesedi.
«Oblys ákimdigi men máslıhat depýtattarynyń qoldaýymen polıtsııa departamentine 64,560 mln teńgege 12 «Largýs» avtokóligi alynyp, sonyń altaýy 103,2 mln teńgege «Arqan»
mobıldi keshenimen jabdyqtalǵan bolatyn. Bul júıe tıimdiligin ári ózin-ózi aqtaıtyndyǵyn qazirdiń ózinde kórsetip otyr», dedi J.Janshın.
Eske sala keteıik, budan buryn BQO-da polıtseılerdiń qatysýymen para alý jáne berý derekteriniń azaımaı otyrǵanyn jazǵan bolatynbyz.
