BQO-da arandatýshylyq uran kótergenderge qatysty qylmystyq is qozǵaldy
Áleýmettik jelide taralǵan beınetaspadan málim bolǵandaı, Norvegııa jalaýy turǵan kadrdan sóılep otyrǵan er adam Ýkraınadaǵy qaqtyǵys týraly aıtyp, sosyn Qazaqstanǵa qatysty arandatýshylyq áńgimelerge kóshedi.
Muny Qazaqstannan úsh adam qyzý qoldap, aldymen «Oral men Chapaevty basyp alý», ol úshin «qolǵa avtomat berý» kerektigin aıtady.
BQO polıtsııa departamenti beınekadrdaǵy úsh adamnyń (bireýi – jasóspirim) anyqtalyp, olardan jaýap alynǵanyn jetkizdi.
«Qazirgi kezde QK 174-baby 2-bóligi (áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý) boıynsha qylmystyq is qozǵalyp, sotqa deıingi tergeý amaldary júrgizilýde. Atalmysh bap boıynsha aıypty dep tanylǵandar (adamdar toby, aldyn ala sóz baılasý arqyly adamdar toby jasaǵan nemese birneshe ret jasalǵan nemese kúsh qoldanýmen ne ony qoldaný qaterin tóndirýmen ulasqan, sol sııaqty adam óziniń qyzmet babyn paıdalana otyryp ne qoǵamdyq birlestik lıderi jasaǵan, onyń ishinde sheteldik kózderden alynǵan qarajat paıdalanyla otyryp jasalǵan dál sol áreketter) belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, bes jyldan on jylǵa deıingi merzimge bas bostandyǵynan aıyrýǵa jazalanady», dep habarlady vedomstvodan.
Kúdiktiler beınejazba arqyly qateleskenderin aıtyp, jurtshylyqtan keshirim surady.
