BQO-da «Ańsaǵan sábı» baǵdarlamasy aıasynda alǵashqy náreste dúnıege keldi

ORAL. QazAqparat - Batys Qazaqstan oblysynda «Ańsaǵan sábı» prezıdenttik baǵdarlamasy aıasynda alǵashqy náreste dúnıege keldi, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, Memleket basshysy Qasym-Jomart Toqaev 2020 jylǵy Qazaqstan halqyna arnaǵan Joldaýynda Úkimetke bıyldan bastap «Ańsaǵan sábı» baǵdarlamasyn júzege asyrýdy tapsyrǵan bolatyn.

Osy baǵdarlamaǵa sáıkes 34 jastaǵy Olga N. (áıeldiń suraýy boıynsha esimi ózgertildi) Almatydaǵy reprodýktıvti medıtsına ınstıtýtynyń reprodýktolog dárigeri Lıýdmıla Badelbaevaǵa júgindi.

Munyń aldynda ol tórt jyl emdelgenimen, nátıjesi bolmaǵan eken. Endi, mine, «Ańsaǵan sábı» baǵdarlamasy aıasynda onyń armany oryndalyp, áıel ómirge salmaǵy 3250 gramm qyz balany ákeldi.

Basqarma málimetine qaraǵanda, qazir anasy men qyzynyń deni saý. Náreste aman-esen ósip keledi.