BQO-da alys aýdandarǵa jol salýǵa 20 mlrd teńge qarastyrylyp otyr

ORAL. QazAqparat – Batys Qazaqstan oblysynda aldaǵy jyly 20 mlrd teńgege Qaztalov-Jánibek-RF shekarasy jáne Ónege-Bısen-Saıqyn joldaryn salý jalǵasady, dep habarlaıdy QazAqparat tilshisi.

BQO jolaýshylar kóligi jáne avtomobıl joldary basqarmasynyń basshysy Baýyrjan Aıtmaǵambetov óńirlik kommýnıkatsııalar qyzmeti alańynda málim etkendeı, Elbasy tapsyrmasyna sáıkes «Nurly jol» memlekettik baǵdarlamasy aıasynda respýblıkalyq mańyzy bar, shalǵaıdaǵy Bókeı ordasy, Jánibek aýdandaryn oblys ortalyǵymen jalǵastyratyn, jalpy uzyndyǵy 245 shaqyrymdy quraıtyn atalmysh joldardy kúrdeli jóndeý jumystary júrgizilýde.

Bıyl bul maqsatqa 2,4 mlrd teńge bólingen bolatyn. Al uzyndyǵy 35 km Chapaev-Jalpaqtal-Qaztalov-RF shekarasy (157-192 km) joly tolyqtaı aıaqtalyp, paıdalanýǵa berildi.

Sondaı-aq bıyl 1,8 mlrd teńgege jalpy uzyndyǵy 76 km Samara-Shymkent (215-251 km, 36 km) jáne Chapaev-Jalpaqtal-Qaztalov-RF shekarasy (17-57 km, 40 km) avtomobıl joldaryna ortasha jóndeý jumystary júrgizildi.

Basqarma basshysynyń sózine qaraǵanda, 2,7 mlrd teńgege oblystyq mańyzy bar Bórli-Aqsaı-Jympıty (139-159 km) jolyn kúrdeli jóndeý jumystary jalǵasyn tapty. 15 km jolǵa jóndeý júrgizilip, sonyń 10 shaqyrymy qoldanysqa berildi.

Basqa da joldarǵa osyndaı jóndeý jasalyp, jyl qorytyndysy boıynsha jaqsy jáne qanaǵattanarlyq jaǵdaıdaǵy jergilikti joldardyń úlesi 34 paıyzǵa jetti.

2020-2025 jyldarǵa arnalǵan «Nurly jol» memlekettik baǵdarlamasy aıasynda bıyl 269,2 km respýblıkalyq, oblystyq jáne aýdandyq joldar jóndeýden ótti.

Sonymen qatar aldaǵy jyly oblystyq jáne aýdandyq mańyzy bar joldarǵa 1,3 mlrd teńge qaralyp otyr. Buǵan uzyndyǵy 50 km Barbastaý-Aqjaıyq-Inder avtomobıl jolyn qaıta jańǵyrtýdy bastaý kózdelýde (bólingen qarajat – 800 mln teńge, joba quny – 6,7 mlrd teńge).

Oǵan qosa Shyńǵyrlaý (Aşysaı), Bórli (Pýgachev), Bókeı ordasy (Bısen) jáne Jánibek (Jasqaırat) aýdanynyń joldaryn jóndeý josparlanýda (bólingeni – 520,6 mln teńge).