BQO-da alys aýdandarda jańartylatyn energııa kózderi qondyrǵysyn ornatý kózdelýde

ORAL. QazAqparat – Batys Qazaqstan oblysynda shalǵaıda ornalasqan Bókeı ordasy jáne Jánibek aýdandarynda jańartylatyn energııa kózderi qondyrǵysyn ornatý kózdelýde, dep habarlaıdy QazAqparat tilshisi.

BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Mırjan Nurtazıevtiń óńirlik kommýnıkatsııalar qyzmeti alańynda ótken brıfıngide málim etkenindeı, atalǵan aýdandar elektr qýatyn reseılik kózderden alady.

Onyń sózine qaraǵanda, qoldanystaǵy jeliler arqyly Bókeı ordasy men Jánibekke óz elektr energııamyzdy jetkizýge múmkindik joq. Joba júzege asqan jaǵdaıda bul oblysty elektr qýaty ımportynan qutyla túsýge múmkindik beredi.

Sonymen qatar jańartylatyn energııa kózderin engizý boıynsha «Green Service Company» JShS kompanııasy qýaty 2,5 MVt elektr energııasyn óndiretin qatty turmystyq qaldyqtardy energetıkalyq kádege jaratý nysany qurylysyn bastaýdy josparlap otyr. Bul joba óndiris jáne tutyný qaldyqtaryn polıgondarǵa áketpeı-aq Oral qalasy aýmaǵyn sanıtarlyq tazartýǵa jol ashady.

«Qosymsha elektr stantsııalaryn salý nátıjesinde Reseıden jetkiziletin qýat kólemi qysqardy. Kúni búgin 14 mln kVt saǵat elektr qýaty kórshi elden jetkizedi. Bul – kóp emes, barlyq tutynylatyn elektr qýaty kóleminiń 11 paıyzy. Aldaǵy ýaqytta da energııany únemdeý jáne tıimdiligin arttyrý, sondaı-aq balamaly qýat kózderin iske qosý baǵytyndaǵy jumystar jalǵasatyn bolady», dedi M.Nurtazıev.

Eske sala keteıik, budan buryn Batys Qazaqstanda elektr qýayn óndirý 4,1 paıyzǵa ósip otyrǵanyn jazǵan bolatynbyz.