BQO-da alys aýdanda úsh aýyl aýyz sýmen qamtylmaqshy
ORAL. QazAqparat - «Aqbulaq» baǵdarlamasy aıasynda oblys ortalyǵynan eń shalǵaı ornalasqan Bókeı ordasy aýdanynda úsh birdeı aýyl aýyz sýmen qamtylmaqshy, dep habarlaıdy «QazAqparat» tilshisi.
Aýdan ákimi Nurlan Rahymjanovtyń aıtýynsha, qazirgi tańda aýdan ortalyǵy Saıqyn aýylynda sý qubyryn qaıta qurý qurylysy júrgizilýde. 2016 jyly 24 qarashada bastalǵan qurylystyń jalpy quny - 372,381 mln astam teńge. Ótken jyly 37 mln, bıyl 146,886 mln teńge bólinip, tıisti jumystar atqaryldy. Tartylatyn sý qubyrynyń uzyndyǵy 47 km 840 metr bolsa, kúni búgin 40 km sý qubyry úılerdiń aýlasyna (937 aýlanyń 530-yna) deıin jetkizildi. Jetispeıtin 88,5 mln jýyq teńge bólingen kezde qurylys tolyqtaı aıaqtalmaqshy.
Bórli aýylynda bıylǵy 24 qazanda bastalǵan sý qubyryn tartý jumysy márege jetip, 28 qazan kúni iske qosyldy. Munyń jalpy quny - 214,683 mln astam teńge. Joba boıynsha 22,8 km sý qubyry tolyǵymen tartylyp, turǵyn úılerge jetkizildi. Bórli aýdan ortalyǵynan 130 shaqyrym jerde ornalasqan.
Bısen aýyldyq okrýgine qarasty Kókterek eldi mekenine sý qubyryn tartý úshin 185,274 mln teńge bólindi. Bıylǵy 24 naýryzda bastalǵan qurylys merzimi 7,4 aı bolǵanymen, bul nysan qarashada paıdalanýǵa berilmekshi. 20,464 km sý qubyry tolyq tartyldy. Qurylys bitken soń Kókterekke qosa Jambyl eldi mekeni de aýyz sýmen qamtylmaqshy.
«Buǵan qosa aýdanymyzdyń taǵy 7 eldi mekenine, Shońaı, Jármeńke, Taıǵara, Ájen, Qarasý, Úshterek jáne Keńoı aýyldaryna sý qubyryn tartý úshin ınjenerlik-geodezııalyq, ınjenerlik-geologııalyq barlaý jáne JSQ daıyndaý jumystary júrgizilýde. JSQ daıyndaýdyń jalpy quny 43,615 mln teńge bolsa, bıylǵa 13,2 mln teńge qaraldy. Osylaısha, oblystaǵy alys aýdandy aýyz sýmen qamtý baǵytynda Elbasy tapsyrmasyna sáıkes óńir basshylyǵynyń qoldaýymen betburys jasalyp otyr», dedi «QazAqparat» tilshisine N.Rahymjanov.
Aıta keteıik, Batys Qazaqstan oblysynda qazirgi kezde 65 myń adam turatyn 55 eldi mekendi ortalyqtandyrylǵan sý kózine qosý jumystary júrgizilýde.
