BQO-da «Altyn uıa» otbasylar baıqaýynda aqjaıyqtyq Bıǵazıevter jeńimpaz atandy
ORAL. 28 qarasha. QazAqparat /Eljan Eraly/ - Oral qalasynda dástúrli «Altyn uıa» otbasylar baıqaýy márege jetti.
«Nur Otan» HDP oblystyq fılıalynyń qoldaýymen oblystyq bilim basqarmasy ótkizgen qorytyndy saıysqa qalalyq, aýdandyq kezeńderde jeńimpaz atanǵan 13 otbasy qatysty. Olar ózderi ákelgen qolóner týyndylaryn usynyp, óz ónerlerin kórsetti. Túrli saýaldarǵa da jaýap berdi. Ásirese, atadan balaǵa mıras bolyp kele jatqan ulttyq ónerdiń jarqyraı kórinýine erekshe mán berildi.
Baıqaý qorytyndysynda Aqjaıyq aýdanynan kelgen Saǵyndyq Bıǵazıevtiń otbasy bas júldeni jeńip aldy. Oraldyq Jolymbetovter - birinshi, syrymdyq Qydyrǵalıevter - ekinshi, jańaqalalyq Qabashevtar úshinshi oryndy ıelendi. Sondaı-aq otbasylar túrli atalymdar boıynsha da marapattaldy.
