BQO-da alty mektep salynyp jatyr

ORAL. QazAqparat – Batys Qazaqstan oblysynda alty mekteptiń qurylysy júrgizilýde, dep habarlaıdy QazAqparat tilshisi.

BQO qurylys basqarmasynyń basshysy Álibek Antazıev málim etkendeı, osy maqsatqa bıýdjetten 2,2 mlrd teńge bólindi.

Onyń aıtýynsha, Kaztalov aýdanyndaǵy Kaztalov aýylynda – ­600, Juldyzda – 108, Saryqudyqta 60 oryndyq mektep boı kóteredi. Sondaı-aq Báıterek aýdanyndaǵy Jambyl aýylynda – 308, Şapovta – 420, Oral qalasynda 300 oryndyq №18 mektep ǵımaraty salynýda.

Sonymen qatar jeke kompanııanyń qarajatyna oblystyń jeti aýdanynda 16 shaǵyn jınaqty mektep qurylysy qolǵa alyndy. Oǵan qosa jeke ınvestıtsııalar esebinen Oral qalasynda №31 jáne №52 orta mektep turǵyzylyp jatyr.

«Osy oraıda Kaztalov aýdanyndaǵy mektep qurylysynda úlken artta qalýshylyq bar ekendigin aıtqym keledi. Juldyz aýylyndaǵy mektep boıynsha merdigerge narazylyq hat joldandy, eger ol jumysty uıymdastyrmasa, sotqa talap-aryz daıyndalady. Saryqudyq mektebi boıynsha merdiger qolaıly aýa raıy kezinde jumysty qaıta bastamaq. Bul ǵımaratty bıylǵy 1 qyrkúıekke deıin salyp bitirý kózdelýde. Aýdan ortalyǵy Kaztalov aýylyndaǵy mektep qurylysy materıaldardyń qymbattaýyna baılanysty toqtatyldy. Jobany túzetkennen keıin jumystar qaıta bastalyp, muny jyl sońyna deıin paıdalanýǵa berýdi josparlap otyrmyz», - dedi Á.Antazıev.

Eske sala keteıik, budan buryn BQO-da 600 myń sharshy metr turǵyn úı paıdalanýǵa beriletinin, Oralda múgedekterdi ońaltý ortalyǵy salynatynyn jazǵan bolatynbyz.