BQO-da alty kúnde shekaradan 45 myńnan astam adam ótti

ORAL. QazAqparat – Batys Qazaqstan oblysynda 1-6 jeltoqsan aralyǵynda memlekettik shekaradan 45703 adam ótti, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkendeı, Reseımen shektesetin «Tasqala», «Syrym», «Jánibek» jáne «Aqsaı» avtoótkelderinen ótkenderdiń ishinde 1470 adamnyń anyqtamasy bolmaı shyqty.

Onyń bári de jeti kúndik karantınge jatqyzylyp, sonyń ishinde 28-inen koronavırýs tabyldy.

Oblysta sondaı-aq qyrkúıek aıynan beri 148 oqýshy men balabaqsha tárbıelenýshisiniń indet juqtyrǵany anyqtaldy. Sonyń ishinde qyrkúıek aıynda – 4, qazanda – 5, qarashada – 102, jeltoqsanda 24 bala aýyrǵan. 14 balabaqsha tárbıelenýshisiniń 13-i qarashada, bireýi jeltoqsanda syrqattanǵan. Olardyń bári de otbasy múshelerinen juqtyrǵan.

Qazirgi tańda óńirde aýyrǵandar sany 8304-ke jetse, sonyń 7422-si jazylyp shyqty. 137 adam indetten kóz jumdy.

Pnevmonııaǵa shaldyqqan 110 adam statsıonarda, 60-y ambýlatorlyq em alýda. Pnevmonııadan 239 adam qaıtty.

Kúni búgin ókpeni jasandy jeldetý apparatyna 3, ottegi kontsentratoryna 8 adam qosylǵan.

Jeti juqpaly aýrýlar aýrýhanasynda 135, tórt karantındik statsıonarda 70 adam emdelýde. 10 adam jansaqtaý bólimshesinde jatyr.

Eske sala keteıik, budan buryn BQO volonterleriniń kimderge jáne qalaı kómektesip jatqanyn jazǵan bolatynbyz.