BQO-da alımentten bereshek 76 mln teńgege jetip otyr
BQO prokýratýrasynyń baspasóz qyzmetinen túsken málimetke qaraǵanda, jyl basynan beri sot oryndaýshylarynda 9,5 myń balanyń paıdasyna alıment óndirý týraly 7,5 myń qujat boldy.
Prokýrorlyq qadaǵalaý aktilerimen 3,5 myń problemalyq qujat 634-ke deıin qysqardy.
Tekseris kezinde ýákiletti organdardyń boryshkerlerge qatysty shekteý qoıý sharalaryn qoldanbaǵany anyqtaldy. Atap aıtqanda, 367 boryshker shetelge esh kedergisiz shyqqan. 600 boryshkerdiń kólik júrgizý quqyǵy shektelmegen. 931 adamnyń múlkine tyıym salynbaǵan. 1,5 myń boryshkerdiń eńbekaqysy men basqa da tabysynan alıment ustalmaǵan.
Boryshkerlerdi jumysqa ornalastyrýmen qatar olardy alıment tólemegeni úshin qylmystyq jaýapkershilikke tartý sharalary qoldanylýda. Mysaly, D. degen azamat 2016-2018 jyldary kámeletke tolmaǵan balasyn kútip-baǵýǵa alıment tólemeı, bereshegi 800 myń teńgeden asqan. Oral qalasy prokýratýrasynyń yqpal etýimen ol QR Ákimshilik quqyqbuzýshylyq kodeksi 669-babyna sáıkes eki márte jaýapkershilikke tartyldy. Biraq sonda da alımentin tólemegen ári qalalyq jumyspen qamtý ortalyǵy usynǵan qyzmetten bas tartqan. Kámeletke tolmaǵandar isteri jónindegi mamandandyrylǵan aýdanaralyq sotynyń úkimimen balany kútip-baǵý boıynsha mindetterin oryndamaǵany úshin D. QR QK 139-babyna sáıkes 300 saǵatqa qoǵamdyq jumystarǵa tartýǵa jazalandy.
Aıta keteıik, alıment tóleýden jaltarý qylmystyq quqyqbuzýshylyq bolyp tabylady, oǵan barǵan adamǵa 2 jyl merzimge deıin bas bostandyǵynan aıyrý jazasy kózdelgen.