BQO-da alımentke qatysty jobasy aıasynda 126 mln teńge óndirildi

ORAL. QazAqparat - QR Bas prokýratýrasy ótken jyldyń qazanynan beri qolǵa alǵan «Alıment tóleýden jaltarýdan 30 qadam» jobasy aıasynda Batys Qazaqstan oblysynda 786 óndiriske qatysty atqarýshylyq is márege jetip, sonyń nátıjesinde 126 mln teńge óteldi. Bul týraly oblys prokýrorynyń aǵa kómekshisi Baýyrjan Ahmetjan málim etti, dep habarlaıdy «QazAqparat» tilshisi.

Onyń aıtýynsha, prokýrorlyq yqpal etý sharalary boıynsha alıment 264 boryshkerdiń jalaqysynan ustaldy. BQO ádilet departamenti men jeke sot oryndaýshylarynyń óńirlik palatasynyń birlesken jumysy nátıjesinde 80 adam ákimshilik, 14-i qylmystyq jaýapkershilikke tartylyp, barlyq is aqtalmaıtyn negizder boıynsha qysqartyldy. Sonymen qatar alıment tóleýge tıisti adamdardyń mindetteri men quqyqtaryn túsindirý, boryshkerlerdi jumyspen qamtý, jalǵyzilikti analardyń járdemaqy alýyna kómek kórsetý baǵytynda jumystar júrgizilýde.  Mysaly, bıyl boryshkerler úshin eki ret bos jumys oryndarynyń jármeńkesi uıymdastyrylyp, 6 adam eńbek ornyn tapty. 13-i jumyssyz retinde tirkeýge qoıylyp, 23-imen áńgimelesý belgilendi.

Barlyq atqarýshylyq óndiristi tekserý barysynda 550 boryshkerdiń turaqty tabysy, 487-siniń menshiginde tirkelgen jyljıtyn jáne jyljymaıtyn múlki bar ekendigi belgili boldy. 20-dan astam óndiris naqty derektermen sáıkestendirildi. Qazirgi tańda atalǵan adamdarǵa qatysty olardyń jalaqysynan jáne múlkinen alımentti óndirý baǵytynda sharalar alynýda. Sonyń ishinde aýyldyq jerde turatyndardyń arasynda turaqty kirisi bolmasa da, olardyń ıeliginde iri qara bar ekendigi málim. Sol maldyń esebinen alıment óndirý tájirıbesi óńirde alǵash ret qolǵa alyndy.