BQO-da Alǵys aıtý kúnine oraı kóptegen sharalar josparlanyp otyr
Qazaqstan halqy BQO assambleıasy tóraǵasynyń orynbasary Ǵaısa Qapaqovtyń aıtýynsha, merekeni ótkizýge baılanysty uıymdastyrý komıteti qurylyp, negizgi is-sharalar jospary bekitildi. Alǵys aıtý kúnine oraı etnomádenı birlestikter, oblystyq mekeme-uıymdar, qala men aýdandar ákimdikterimen birlese otyryp, jetimder men ata-ana qamqorlyǵynsyz qalǵan balalarǵa, Uly Otan soǵysy ardagerleri men múgedekterge, az qamtylǵan jáne kóp balaly otbasylarǵa, barlyq áleýmettik kómekke muqtaj jandarǵa arnalǵan qaıyrymdylyq sharalary ótkiziledi.
Mádenı oryndarda «Elbasyna alǵysymyz sheksiz» atty dóńgelek ústelder men taqyryptyq keshter, M.Ótemisov atyndaǵy Batys Qazaqstan memlekettik ýnıversıtetinde «Ortaq tarıh, ortaq taǵdyr - birtutas ult» degen taqyrypta ǵylymı-tájirıbelik konferentsııa, Oral qalasyndaǵy «Qazaq halqyna myń alǵys» eskertkishi janynda túrli ult ókilderi jastarynyń teatrlandyrylǵan kórinisi, barlyq aýrýhanalar men emhanalarda «Aq halatty abzal jandar» atty ashyq esik kúnderin ótkizý kózdelýde. Bul kúnderi jasy kishiler aqsaqaldarǵa qurmet kórsetip, bata alsa, oqý oryndarynda «Alǵys aıtý - paryzym» atty sabaqtar, «Ata-anam - altyn tuǵyrym» atty sýretter kórmesi, sondaı-aq el namysyn abyroımen qorǵap júrgen sportshylarmen kezdesýler uıymdastyrylady.
Oblystyq halyq shyǵarmashylyǵy ortalyǵynyń dırektory Medhat Qambetovtiń sózine qaraǵanda, negizgi shara 1 naýryz kúni Oraldaǵy Syrym Datuly atyndaǵy alańda ótedi. Onda táýelsiz Qazaq eliniń ulttyq qundylyqtaryn, túrli ult ókilderiniń tatý-tátti tirligin pash etetin alty bólimnen turatyn kórinis qoıylyp, ol «Súıinshi», «Kórimdik» syndy salt-dástúrge ulasyp, aq batamen támamdalady.