BQO-da alǵash ret jańa apparatpen kúrdeli kóz otasy jasaldy

ORAL. QazAqparat – Batys Qazaqstan oblystyq aýrýhanasynyń oftalmologııalyq bólimshesinde Leica mıkrosopynyń kómegimen alǵash ret kúrdeli kóz otasy jasaldy, dep habarlaıdy QazAqparat tilshisi.

Dárigerlerdiń sózine qaraǵanda, bolashaqta atalmysh bólimshe ózge óńirlerden de patsıentter qabyldaı alady.

Birinshi bolyp Bórli aýdanynyń 86 jastaǵy turǵynyna jasalǵan ota sátti ótti.

«Emdelýshi glaýkoma jáne ishki kóz qysymymen aýyratyn. 20 mınýttaı ýaqytqa sozylǵan otadan keıin qarııa erteńnen bastap qalypty ómirge orala alady. Qazirgi kezde aýdandardan patsıentter kóptep kelýde», dedi hırýrg-oftalmolog Dáýren Ermuhambet.

Oftalmologııalyq bólimshede jylyna 1200-ge deıin ota jasalady. 40 tósekke eseptelgen bólimshede kúndizgi statsıonarǵa qosa turǵyndar ambýlatorlyq em alady.

«Leica mıkroskopy – óte usaq tamyrlardyń ózin dál kórsetetin optıka. Bul qurylǵynyń kómegimen glaýkoma, katarakta jáne basqa kóz aýrýlaryna ota jasaýǵa bolady. Bir apta ishinde árqaısysy 20-25 mınýtqa sozylatyn 40-taı ota jasaý josparlanýda. Bólimshede alty dáriger bolsa, sonyń úsheýi ota jasaıdy. Eki maman Máskeýdegi Halyqaralyq medıtsınalyq bilim akademııasynda qaıta daıarlyqtan ótken», dedi bólimshe meńgerýshisi Tólegen Ishanov.

Kóp uzamaı oblystyq aýrýhanaǵa osyndaı taǵy bir apparat alynbaqshy.

Eske sala keteıik, budan buryn Batys Qazaqstanda 6 myńǵa jýyq adamnyń Pfizer vaktsınasyn saldyrǵanyn jazǵan bolatynbyz.