BQO-da áleýmettik osal toptaǵy 19 myńnan astam adam turǵyn úı kezeginde tur
ORAL. KAZINFORM — Batys Qazaqstan oblysy aýdandarynda bıyl halyqtyń áleýmettik osal toptary sanatyndaǵy turǵyndar úshin 700-den astam páter satyp alý kózdelip otyr.
BQO qurylys basqarmasynyń basshysy Nurken Moldashevtiń óńirlik kommýnıkatsııalar qyzmeti alańynda ótken brıfıngte málim etkenindeı, bul maqsatqa 14 mlrd teńge, sonyń ishinde jergilikti qazynadan 4 mlrd, respýblıkalyq bıýdjetten 9,9 mlrd teńge qarastyrylǵan.
Nurken Moldashevtiń sózine qaraǵanda, sonymen qatar baspanasy apatty dep tanylǵan otbasylar úshin Oral qalasy men Tasqala aýdanynda 131 páter satyp alynatyn bolady.
— Atalǵan is-sharalar turǵyn úıge qoljetimdilikti arttyrýǵa, áleýmettik osal toptardy qoldaýǵa jáne óńirdegi qurylys salasynyń turaqty damýyn qamtamasyz etýge baǵyttalǵan. Kúni búgin oblys boıynsha halyqtyń áleýmettik osal toptary sanatyna kiretin 19 myńnan astam turǵyn kezekte tur. Ótken jyly atalǵan sanattaǵy turǵyndar úshin Oral qalasy jáne aýdandardan 580 páter satyp alyndy. Al turǵyn úıi apatty dep tanylǵan otbasylarǵa 147 páter berildi, — dedi Nurken Moldashev.
Basqarma basshysynyń aıtýynsha, oǵan qosa 2026 jyly «Otbasy bankiniń» salymshylaryna baspana berý maqsatynda Oraldaǵy «Aqjaıyq» shaǵynaýdanynda jańa kvartaldan jeke qurylys salýshylardan 11 turǵyn úı qurylysy bitken soń 1 200 páter satyp alý josparlandy.
Turǵyn úıler IV jaılylyq klasyna saı bolýy tıis, taza árleýde beriledi. Aýlasy abattandyrylǵan jáne kógaldandyrylǵan, demalys aımaqtary men avtoturaqtary bar, zamanaýı materıaldar qoldanylady.
— 2026 jyly «Turǵyn úı-kommýnaldyq ınfraqurylymdy damytýdyń tujyrymdamasy» aıasynda kezekte turǵandar úshin Oralda 4 kóppáterli turǵyn úı jáne Terekti aýdany Podstepnyı aýylynda 13 turǵyn úı qurylysy oılastyrylǵan. Nátıjesinde barlyǵy 776 páterdi jyl sońyna deıin paıdalanýǵa berý kózdelýde, — dep qosty Nurken Moldashev.
Eske sala keteıik, budan buryn Oral qalasynda jeke turǵyn úı salý úshin jer telimi berile me, sony jazǵan bolatynbyz.
