BQO-da áleýmettik salaǵa 45,8 mlrd teńge jumsaldy
BQO qarjy basqarmasynyń basshysy Aıgúl Salahatdınovanyń aıtýynsha, bul - oblys bıýdjeti shyǵysynyń 31 paıyzy. Sonyń ishinde bilim salasyna 20,4 mlrd, densaýlyq saqtaýǵa 15,1 mlrd, mádenıet pen sportqa 5,6 mlrd jáne áleýmettik qamtýǵa 4,7 mlrd teńge bólindi.
2015 jyldan bastap oblys aýmaǵynda Ulttyq qordyń maqsatty transfertteri men bıýdjettik nesıeleri esebinen «Nurly jol» memlekettik baǵdarlamasy júzege asyrylýda. 2015-2016 jyldary bul maqsatqa oblys bıýdjetine 15,7 mlrd teńge bólinse, bıyl 7,2 mlrd teńge qaraldy. Mysaly, osy qarjy esebinen 4,7 mlrd teńgege Oral qalasynda 2400 oryndyq tórt mektep qurylysy aıaqtalyp keledi. Bul qala mektepterindegi oqý júıesin qalypqa keltirýge, ıaǵnı úsh aýysymdyqtan qutylýǵa múmkindik beredi.
Bıýdjettik nesıeleý arqyly Aqjaıyq, Bórli, Zelenov jáne Syrym aýdandarynda turǵyn úı-kommýnaldyq sharýashylyq salasynda 2,5 mlrd teńgege 9 joba júzege asyrylýda. Sonyń nátıjesinde sýmen jáne jylýmen qamtý júıeleri jańartylyp, jelilerdiń tozýy 5,7 paıyzǵa qysqarady.
Oǵan qosa bıyldan bastap «Nurly jer» turǵyn úı qurylysy baǵdarlamasy qolǵa alynǵany belgili. Bul maqsatqa 2,9 mlrd teńge qarastyrylyp, kommýnaldyq turǵyn úı qory men ınjenerlik-kommýnıkatsııalyq ınfraqurylymdy jobalaý, salý jáne damytý baǵytynda Oral qalasy men aýdandarda 10 joba iske asyryldy.
2020 jylǵa deıingi óńirlerdi damytýdyń biryńǵaı baǵdarlamasy aıasynda eldi mekenderdi sýmen qamtý salasynda 39 joba qolǵa alyndy. Buǵan 10,4 mlrd teńge bólinip, sonyń nátıjesinde 55 aýyl taza aýyz sýǵa qol jetkizetin boldy.
Budan bólek respýblıkalyq jáne jergilikti bıýdjet qarjysy esebinen aýyldar gazdandyrylýda. Oral jylý-qýat ortalyǵyna jetkizetin magıstraldy gaz qubyry da tartylýda. Jalpy quny 7,0 mlrd teńge bul jobalar iske qosylǵannan keıin 35 eldi meken tabıǵı gazǵa qosylmaqshy.
«Bıylǵy oblys bıýdjeti 119,0 mlrd teńge kóleminde bekitilip, ózgertýler men tolyqtyrýlar engizý nátıjesinde 145,2 mlrd teńgege jetti. Qarjy basqarmasy bıýdjettik qarjylardyń ıgerilýine júıeli túrde monıtorıng júrgizip, baqylaý jasap, tıisti sharalardy qabyldap keledi», dedi «QazAqparat» tilshisine Aıgúl Baqytjanqyzy.
