BQO-da áleýmettik salada 46 nysan jańartylýda
Óńir basshysynyń aıtýynsha, Elbasy tapsyrmasyna sáıkes turǵyndardyń ómir súrý sapasyn arttyrý baǵytynda «Nurly jol», «Nurly jer» baǵdarlamalary men memlekettik bıýdjet aıasynda áleýmettik ınfraqurylymdarda keshendi qurylys jumystary júrgizilýde. Jańartylyp jatqan nysandardyń kópshiligi aýyldyq eldi mekenderde ornalasqan. Densaýlyq saqtaý salasynyń 19 nysany kúrdeli jóndelýde. Sonymen qatar 10 bilim berý oshaǵy boı kóterip jatsa, sonyń segizi - Derkól, Zachagan, Zelenov aýdanyna qarasty Darııan, Qaztalovtaǵy Qaztalov, Aqjaıyqtaǵy Shabdarjap aýyldarymen qatar Oral men Aqsaı qalasyndaǵy orta mektepter. Bıyl 3 mektep pen 1 mektep ınternatyn paıdalanýǵa berý kózdelýde. Al Aqsaı qalasyndaǵy balabaqsha iske qosyldy. Oǵan qosa memlekettik-jekeshelik áriptestik aıasynda 1210 oryndyq 4 balabaqsha qurylysynyń jobalyq-smetalyq qujattamasy daıyndaldy. Bulardyń ekeýi Oralda (360 jáne 290 oryndyq), taǵy ekeýi (280 orynnan) Jympıty men Chapaev aýyldarynda salynbaq. Degenmen óńirdegi balabaqshalardyń (474-tiń 28-i) tek 6 paıyzy ǵana jekemenshik. Sondyqtan memlekettik-jekeshelik áriptestik múmkindikterin barynsha keńinen paıdalaný kerek-aq.
«Mektepterdi keń jolaqty ınternetpen, «Qaýipsiz mektep» aıasynda beınebaqylaý kameralarymen qamtamasyz etý jumystary jalǵasýda. 600-den astam bilim berý oshaǵy 5 myń vıdeokameralar aldy. Bul óz kezeginde qaýipsizdik sharalarynyń artýyna kómektesedi. Taǵy 384 orta mektep «Bilim Media» ınnovatsııalyq bilim berý júıesine qosyldy. Respýblıkada mektep oqýshylaryn ystyq tamaqpen qamtamasyz etetin úsh óńir bolsa, sonyń biri - Batys Qazaqstan. Oqýshylardyń 95 paıyzy mekteptegi ystyq tamaqpen qamtylǵan. Óńirimizde densaýlyq saqtaý salasyn zamanaýı qurylǵylarmen jabdyqtaý men tsıfrlyq júıege ótkizý turaqty túrde júrgizilýde. Medıtsınalyq aqparattyq júıe, óńirlik birtutas «Call-center» ortalyǵy, elektrondy kezek, elektrondy tablo, «Sozylmaly ınfektsııalyq emes aýrýlardy basqarý baǵdarlamasy» atty pılottyq jobalardyń barlyǵyn osy tsıfrlyq júıege kóshirýdiń naqty nátıjesi deýge tolyq negiz bar. Alys eldi mekenderdegi densaýlyq saqtaý nysandary kúrdeli jóndelip, kóliktermen qamtamasyz etilýde», dedi Altaı Kólginov.
Oblys basshysy basqa da salalar boıynsha atqarylǵan jumystarǵa toqtaldy.