BQO-da aldaǵy úsh jylda 20 mlrd teńgege elektr jelileri men jabdyqtaryn qaıta qurý kózdelýde
BQO energetıka jáne turǵyn úı-kommýnaldyq sharýashylyq basqarmasynyń basshysy Mırjan Nurtazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, bul joba QR Úkimetiniń qaýlysymen bekitilgen oblystyń keshendi damý jospary aıasynda júzege aspaqshy.
Onyń sózine qaraǵanda, 2023 jyly – 6 mlrd, 2024 jyly – 7 mlrd, 2025 jyly 7 mlrd teńge qarastyrylmaqshy.
Qazirgi kezde óńirde elektr jelileri men qosalqy stantsııalardyń 82 paıyzy tozsa, atalǵan jospar júzege asqan jaǵdaıda 62 paıyzǵa deıin tómendeıdi.
Kúni búgin 97 mln-ǵa jýyq teńgege 12 jobalyq-smetalyq qujattama jasalýda.
«Sonymen qatar jóndeý jumystary «Batys Qazaqstan aımaqtyq elektr jelilik kompanııasy» JShS-nyń óz qarajaty esebinen jyl saıyn júrgiziledi. Bıyl osy maqsatqa 707,2 mln teńge bólinip, tıisti jumystar atqaryldy. Sondaı-aq bıyl atalǵan seriktestik úshin 437,1 mln teńgege tótenshe jaǵdaı jelisi arqyly túrli tehnıka satyp alýǵa bıýdjettik ótinim joldandy», dedi Mırjan Nurtazıev.
Eske sala keteıik, budan buryn «Jaıyqjylýqýat» AQ-nyń jylý qubyrlary 50,7 paıyzǵa tozǵanyn jazǵan bolatynbyz.