Alaıaqtyq jolmen alynǵan qarajatty dropper arqyly aınalymǵa shyǵarý shemasy áshkerelendi
ASTANA.KAZINFORM - QMA Batys Qazaqstan oblysy boıynsha departamenti azamattardyń bank shottaryna zańsyz qol jetkizip, qylmystyq qarjy operatsııalaryn júzege asyrǵan toptyń áreketin toqtatty.
Kúdikti Veıdner T.E. alaıaqtyqpen alynǵan qarajatty úshinshi tulǵalardyń shottary arqyly aýdaryp, qolma-qol aqshaǵa aınaldyrýǵa baǵyttalǵan shemany ázirlep úılestirgen. Ol osy maqsatta dropperdi, ózge de tulǵalardy zańsyz áreketterge tartyp, olardyń árqaısysyna naqty mindetter bólip bergen.
Mundaı áreketterge qatysqany úshin dropperlerge 200-den 350 AQSh dollaryna deıin syıaqy tólegen.
Máselen, 2025 jylǵy qazanda Oral qalasyndaǵy stýdentterdiń biriniń atyna bank shottary ashylyp, onlaın-bankıngke qol jetkizý derekteri shema uıymdastyrýshysyna berilgen. Atalǵan shottar arqyly ınternet-alaıaqtyqtan túsken qarajat júrgizilip, keıin olar aıyrbastalyp, shetelge aýdarylǵan.
Shot ıesi bolyp jatqan áreketterdiń zańsyz ekenin túsingen soń, óz erkimen quqyq qorǵaý organdaryna júginip, sonyń nátıjesinde qarjy operatsııalaryn der kezinde shekteýge múmkindik týǵan. Shottar buǵattalǵannan keıin kúdikti men onyń sybaılastary jábirlenýshige qysym kórsetip, bank qosymshalaryn qaıta verıfıkatsııalaýdy talap etken.
Ony páterde zańsyz ustap, kúsh qoldanamyz dep qorqytyp, uıaly telefonyn lombardqa ótkizýge májbúrlegen, al túsken qarajatty ózara bólisken.
Sonymen qatar, kúdiktiler shottardaǵy shekteýlerdi alyp tastaýǵa áreket jasap, jábirlenýshini bankter men ákimshilik organdarǵa ertip júrgen.
Shema uıymdastyrýshysy qamaýǵa alyndy, al onyń alty sybaılasyna qatysty kepil jáne elden shyqpaý túrindegi bultartpaý sharalary qoldanyldy.
Іs sotqa joldandy.
Qazaqstan Respýblıkasy QPK-niń 201-babyna sáıkes ózge aqparat jarııa etýge jatpaıdy.
- Qarjylyq monıtorıng agenttigi eskertedi: «dropperlik» shemalaryna qatysý, onyń ishinde bank rekvızıtterin berý jáne shottarǵa qoljetimdilikti usyný – zańǵa qaıshy áreket bolyp sanalady jáne qylmystyq jaýapkershilikke ákep soǵýy múmkin. Azamattarǵa saqtyq tanytyp, ózderiniń banktik shottaryn zańsyz qarjylyq operatsııalarda paıdalanýǵa jol bermeýge shaqyramyz, - delingen habarlamada.
QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.
