BQO-da alaıaqtyq jasaǵan sheneýnikke 7 mln teńge aıyppul salyndy
ORAL. KAZINFORM — Oral qalalyq sotynda QR QK 190-baby 3-bóligi 2-tarmaǵyna sáıkes memlekettik qyzmetshige úkim shyqty.
BQO sotynyń baspasóz qyzmetinen málim etkenindeı, oblystyq kásipkerlik jáne ındýstrııaldy-ınnovatsııalyq damý basqarmasynyń bólim basshysy 2025 jylǵy qazan aıynda jábirlenýshige memlekettik grant alýǵa járdemdesetinin aıtyp, onyń senimine kirgen.
Konkýrstyq komıssııa sheshimine yqpal etýge naqty ókilettigi bolmaǵanyna qaramastan, ol aldaý jolymen jábirlenýshiden 700 myń teńge alyp, óz paıdasyna jaratqan. Keıin jábirlenýshiniń atynan grantqa berilgen ótinim qoldaý tappaǵan.
Sot talqylaýy barysynda M. óz kinásin tolyq moıyndap, keltirilgen materıaldyq zalaldy tolyq kólemde ótedi. Jábirlenýshi zalaldyń ótelgenin rastap, sottan jeńil jaza taǵaıyndaýdy surady.
Úkim shyǵarý kezinde sottalýshynyń kinásin moıyndap, jasaǵan isine ókinýi, keltirilgen zalaldy tolyq óteýi jáne jábirlenýshiniń pikiri qylmystyq jaýaptylyq pen jazany jeńildetetin mán-jaılar retinde eskerildi.
- Oral qalalyq sotynyń úkimimen sottalýshy QR Qylmystyq kodeksiniń 190-baby 3-bóliginiń 2-tarmaǵy boıynsha kináli dep tanylyp, oǵan urlanǵan múlik qunynyń on eselik mólsherinde 7 mln teńge aıyppul salý túrindegi jaza taǵaıyndaldy. Sondaı-aq ol memlekettik qyzmette jáne kvazımemlekettik sektor sýbektilerinde laýazym atqarý quqyǵynan ómir boıyna aıyryldy. Úkim zańdy kúshine engen joq, - dep habarlady vedomstvodan.
Eske sala keteıik, budan buryn BQO-da býhgalterdiń 106 mln teńge bıýdjet qarjysyn qumar oıynǵa jumsaǵanyn jazǵan edik.
