BQO-da alaıaqtyq saldarynan turǵyndarǵa 2 mlrd astam teńge zalal keltirildi

BQO polıtsııa departamentiniń bastyǵy Arman Orazalıevtiń óńir turǵyndarymen kezdesýinde málim etkenindeı, atalmysh qylmys alaıaqtyq derekteriniń jalpy sanynyń 68 paıyzyn qurap otyr.

Onyń sózine qaraǵanda, ótken jyly jábirlenýshilerge 2 mlrd astam teńge zalal keltirildi. Polıtsııaǵa shaǵymnyń kesh túsýine baılanysty sonyń tek 380 mln 630 myń teńgesi ǵana qaıtaryldy.

— Mysal retinde Oral qalasynyń eki turǵynyna qatysty kóp epızodtyq isti aıtýǵa bolady. Olar Instagram áleýmettik jelisinde nesıe alýǵa kómektesemin dep jalǵan habarlandyrý ornalastyryp, aldaý jolymen azamattardyń 25,5 mln astam teńgesin ıemdengen. Bular alaıaqtyqtyń 67 epızodyn jasaýǵa barǵan. Qazirgi kezde qylmystyq is sotta qaralýda, — dedi A.Orazalıev.

Departament bastyǵynyń aıtýynsha, oblystyń úsh turǵyny WhatsApp arqyly ózderin jábirlenýshilerdiń týysy jáne tanysy retinde kórsetip, qaryzǵa aqsha suraǵan. Olarǵa 5 mln teńgedeı zalal keltirgen 14 epızodtyq qylmystyq is sotqa joldandy.

Transulttyq alaıaqtyq is-áreketterge qatysyp, kýrer retinde 97 mln teńgeni ıemdengen Ózbekstan azamaty 5 jyl 6 aıǵa sottaldy. Sondaı-aq kýrerlik jolmen 150 mln teńgeni qoldy qylǵan Almaty qalasynyń turǵyny da osyndaı jazaǵa kesildi. Júrgizýshi kýáligin alyp berýge kómektesemin dep habarlandyrý uıymdastyrǵan aqtóbelik turǵyn 1 mln 260 myń teńgege 10 epızodtan turatyn qylmys jasaǵan.

— Kıberqylmyskerler úshin shekara da, ult ta joq, olarǵa mańyzdysy — jábirlenýshilerdiń qarjysy ǵana. Alaıaqtardyń qarmaǵyna kóbinese halyqtyń áleýmettik osal toptaryna kiretin zeınetkerler, muǵalimder, medıtsına salasynyń ókilderi, tehnıkalyq qyzmetkerler túsip jatady. Osy oraıda turǵyndar arasynda esepshottardy EGOV arqyly erikti túrde buǵattaý týraly túsindirý jumystary júrgizilip keledi. Qazirdiń ózinde 80 myńnan astam esepshot buǵattaldy, — dep qosty A.Orazalıev.

Eske sala keteıik, budan buryn BQO-da ınternet-alaıaqtar jábirlenýshilerge 1,8 mlrd teńge zalal keltirgenin jazǵan bolatynbyz.