BQO-da alaıaqtarǵa járdemdesken 26 jastaǵy turǵyn 5,6 jylǵa sottaldy

ORAL. KAZINFORM — Batys Qazaqstan oblysynda alaıaqtardyń asa iri kólemde qarjy jymqyrýyna kómektesken 26 jastaǵy turǵynǵa qatysty úkim shyqty.

BQO polıtsııa departamentiniń baspasóz qyzmetinen málim etkenindeı, belgisiz adamdar ózderin Ulttyq qaýipsizdik komıteti men Ulttyq bank qyzmetkerleri retinde tanystyryp, Oral qalasynyń turǵynyn aldaǵan. 

Olar psıhologııalyq qysym jasaý arqyly atalǵan turǵyndy jeke depozıtinen birneshe ondaǵan mln teńgeni sheship alyp, aqshany kýrerlik qyzmet arqyly taksı júrgizýshilerinen berip jiberýge kóndirgen. 

— Jedel is-sharalar nátıjesinde alaıaqtarǵa járdemdesken jigit Qyzylorda oblysynyń Aral qalasynda ustaldy. Tintý kezinde odan 2 myń AQSh dollary men 265 myń teńge tabyldy. Aıyptalýshy óziniń áreketi zańsyz ekenin bile tura jábirlenýshiniń aqshasyn birneshe márte qabyldap, alaıaqtarǵa bergeni anyqtaldy. Sot úkimimen ol kináli dep tanylyp, 5 jyl 6 aıǵa bas bostandyǵynan aıyryldy. Qazirgi kezde qylmystyń basqa da qatysýshylaryn izdestirý jumystary jalǵasýda, — dep habarlady vedomstvodan.

Eske sala keteıik, budan buryn BQO-da alaıaqtarǵa senip qalǵan kásipkerdiń 22 mln teńgesinen aıyrylǵanyn jazǵan edik.