BQO-da alaıaqtarǵa senip qalǵan kásipker 22 mln teńgesinen aıyryldy
ORAL. KAZINFORM — Batys Qazaqstan oblysynda Bórli aýdany polıtsııa bólimine 30 jastaǵy kásipker áıelden qarajatynyń urlanǵany jóninde aryz tústi.
BQO polıtsııa departamenti kıberqylmysqa qarsy is-qımyl basqarmasynyń bastyǵy, polıtsııa polkovnıgi Artýr Musaǵalıevtiń málim etkenindeı, jábirlenýshige WhatsApp mobıldi qosymshasy arqyly ózin salyq basqarmasynyń qyzmetkeri retinde tanystyrǵan áıel habarlasqan.
Ol salyq deklaratsııasynda qatelikter anyqtalǵanyn aıtyp, qysqa nómir 1414 arqyly kelgen SMS-kodty aıtýyn suraǵan. Muny alaıaqtyqtyń jańa túri deýge bolady.
Biraz ýaqyttan keıin jábirlenýshige ózin HQKO jáne Ulttyq bank qyzmetkerleri retinde tanystyrǵan basqa adamdar qońyraý shalyp, onyń atyna alaıaqtar nesıe rásimdegenin habarlaǵan. Olar aqshany qorǵaý syltaýymen qarajatty «qaýipsiz shottarǵa» aýdarýdy usynǵan.
- Alaıaqtarǵa senip qalǵan áıel birneshe bankten nesıe rásimdegen. Barlyq aqsha alaıaqtar aıtqan shottarǵa aýdarylǵan. Atalǵan derek boıynsha qylmystyq is qozǵalyp, tergeý amaldary júrgizilýde. Polıtsııa qyzmetkerleri qylmysqa qatysy bar kúdiktilerdi anyqtaý sharalaryn qabyldaýda. Jábirlenýshiniń sózine qaraǵanda, buǵan deıin ol osyndaı alaıaqtyq shemalar týraly eskertilgenine qaramastan, sóılesý kezinde qatty psıhologııalyq qysymda bolǵan, - deıdi A.Musaǵalıev.
Onyń aıtýynsha, jábirlenýshige 22 mln teńge shyǵyn keltirilgen.
- Turǵyndarǵa 1414 sııaqty qysqa nómirlerden kelgen SMS-kodtardy eshkimge aıtpaý kerektigin eske salamyz. Memlekettik organdar, bankterdiń jáne quqyq qorǵaý organdarynyń qyzmetkerleri eshqashan aqshany «qaýipsiz shottarǵa» aýdarýdy talap etpeıdi. Kúdikti qońyraýlar túsken jaǵdaıda áńgimelesýdi dereý toqtatyp, 102 nómiri boıynsha polıtsııaǵa júginý kerek. SMS-kodty aıtyp qoıǵan jaǵdaıda alaıaqtarmen baılanysty dereý úzip, bankke jáne polıtsııaǵa habarlasý qajet. Bul áreket neǵurlym tez jasalsa, aqsha urlyǵyn boldyrmaý múmkindigi soǵurlym joǵary, - dep qosty A.Musaǵalıev.
Eske sala keteıik, budan buryn alaıaqtar BQO turǵyndaryna 280 mln-ǵa jýyq teńge shyǵyn keltirgenin jazǵan edik.