BQO-da alaıaqtar jábirlenýshilerge keltirgen zalal 260 mln teńgeden asty
ORAL. KAZINFORM – Batys Qazaqstan oblysynda bıylǵy eki aıda 105 ınternet-alaıaqtyq qylmysy tirkeldi.
BQO polıtsııa departamentiniń baspasóz qyzmetinen málim etkenindeı, «Kıberqadaǵalaý» aqparattyq júıesine 280 quqyqqa qarsy ınternet-resýrs engizildi.
Eki aıda jábirlenýshilerge keltirilgen 260 mln teńgeden astam zalalǵa qatysty 697 kúdikti esepshot buǵattaldy. Sonyń ishinde 2,5 mln teńge buǵattaldy, 1 mln teńge qaıtaryldy. Al 1,5 mln teńge boıynsha qaıtarý jumystary júrgizilip jatyr.
Jyl basynan beri 27 myńnan astam adam qamtylǵan profılaktıkalyq is-sharalar ótkizildi. «Egov» saıty arqyly 8 myńnan astam azamat nesıe alýdan erikti túrde bas tartty. 2026 jylǵy 1 aqpan – 30 sáýir aralyǵynda oblys aýmaǵynda respýblıkalyq «Anti-fraud» jedel-aldyn alý is-sharasy ótkizilýde. Kúni búginge deıin 61 qylmys ashyldy, onyń ishinde 33-i táýlik ishinde, 28-i – buryn jasalǵan qylmystar, munyń 11-i ótken jyldar sanatynan. Bıylǵy eki aıda eń úlken tirkelgen shyǵyn – 16 mln teńge (ınvestıtsııalyq jarnama).
– Internet-alaıaqtyqtyń keń taralǵan túrleri: jalǵan qońyraýlar, messendjerler arqyly jasalatyn aldaý áreketteri. Fıshıngtik siltemeler jáne derbes málimetterdiń qaýipsizdigin saqtaý máseleleri boıynsha alaıaqtar azamattardy aldaıdy. Sondyqtan azamattardy kúmándi habarlamalar men qońyraýlarǵa senbeýge, jeke derekterdi bógde tulǵalarǵa bermeýge jáne kúmán týdyrǵan jaǵdaılarda quqyq qorǵaý organdaryna jedel habarlasýǵa shaqyramyz, - dep habarlady vedomstvodan.
Eske sala keteıik, budan buryn Almatyda iri kólemde alaıaqtyq jasaǵan kúdiktiniń Oralda ustalǵanyn jazǵan bolatynbyz.
