BQO-da alaıaqtar muǵalimniń atyna 9 mln teńge nesıe rásimdegen

ORAL. KAZINFORM — Batys Qazaqstan oblysy Tasqala aýdanynyń 54 jastaǵy muǵalimi alaıaqtardan zardap shekti.

BQO polıtsııa departamentiniń baspasóz qyzmetinen málim etkenindeı, alaıaqtar aldanǵan áıeldiń atyna tórt birdeı bankten nesıe rásimdegen. Sóıtip ony 9 mln teńge shyǵynǵa qaldyrǵan.

Qazirgi kezde QR QK 190-babyna sáıkes tergeý amaldary júrgizilýde. 

Sonymen qatar Oral qalasynyń 51 jastaǵy turǵyny alaıaqtardyń arbaýyna túsip, 600 myń teńgesin aýdaryp jibergen. 

- Alaıaqtar Ulttyq qaýipsizdik komıteti men banktiń qaýipsizdik qyzmetiniń mamandarymyz dep ózderin tanystyryp, azamattarǵa habarlasady. Olar jábirlenýshilerdiń esepshottaryn qorǵaımyz degen syltaýmen qarjysyn ıemdenip ketip jatyr. Oblystyq polıtsııa departamenti turǵyndarǵa abaı bolý kerektigin, banktik karta derekterin, qupııa sózder men SMS arqyly keletin rastaý kodtaryn telefon arqyly eshkimge aıtpaý kerektigin eske salady, - dep habarlady vedomstvodan.

Eske sala keteıik, budan buryn Batys Qazaqstanda júk kóligi janyp ketkenin jazǵan bolatynbyz.