BQO-da alaıaqtar dropperler arqyly 17 mln astam teńgeni aýdaryp jibergen

ORAL. KAZINFORM — BQO boıynsha ekonomıkalyq tergep-tekserý departamentinde dropperlikke qatysty bir qylmystyq is tirkeldi.

Departament basshysynyń orynbasary Azamat Ahmetovtiń málim etkenindeı, dropperlik shemany uıymdastyrýshylar «ýaqytsha qosymsha jumys» degen jeleýmen jas azamattarǵa ekinshi deńgeıli bankterde óz atyna shot ashýdy usynǵan. 

Onyń sózine qaraǵanda, ınternet-bankıngtiń mobıldi qosymshalary alaıaqtardyń uıaly telefondaryna ornatylǵan. Sondyqtan shottarǵa qoljetimdilik solardyń baqylaýyna alynǵan.

— Mundaı áreketterge qatysqany úshin dropperler 200-den 350 AQSh dollaryna deıin syıaqy alyp otyrǵan. Internet-alaıaqtyqtyń qurbanyna aınalǵan azamattardyń aqshalaı qarajaty atalǵan shottar arqyly aýdarylǵan. Osylaısha, zańsyz operatsııalardyń jalpy kólemi 17 mıllıon teńgeden asty, — deıdi A.Ahmetov.

Onyń aıtýynsha, bank shoty buǵattalǵannan keıin dropperlerdiń biri zańsyz áreketterge odan ári qatysýdan bas tartqan. Alaıda qylmystyq top músheleri qarajatqa qol jetkizý maqsatynda ony urlap áketip, kúsh qoldanamyz dep qorqytyp, shotqa qoljetimdilikti qalpyna keltirýdi talap etken.

Qazirgi ýaqytta uıymdastyrýshy kúdikti retinde tanylyp, oǵan qatysty qamaýda ustaý túrindegi bultartpaý sharasy qoldanylǵan. Sotqa deıingi tergep-tekserý aıaqtalý satysynda.

Eske sala keteıik, budan buryn BQO-da jalǵan qyzmet kórsetken 17 kásiporynnyń aqsha aınalymy 2 mlrd teńgeden asqanyn jazǵan edik.