BQO-da alaıaq zeınetkerdiń 1 mln teńgesin aldap alyp ketken
ORAL. QazAqparat - Batys Qazaqstan oblysynda sońǵy aptada toǵyz birdeı alaıaqtyq deregi tirkeldi, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, alaıaqtyq úsh márte aqsha, uıymdastyrý tehnıkasyn utyp alasyń degen jeleýmen jasalǵan. Sondaı-aq úsh ret qaryzǵa alynǵan aqsha qaıtpaǵan. Sol sekildi jer telimin, ǵalamtor arqyly avtokólikke qosalqy bólshek satyp alamyn jáne noýtbýgin jóndetemin dep jer soǵyp qalǵandar bar.
Mysaly, 14 tamyz kúni alaıaq Oral qalasyndaǵy Qurmanǵazy jáne Á.Moldaǵulova atyndaǵy kóshelerdiń qıylysynda tez utysqa ıe bolasyńdar dep eki adamnyń 225 myń teńgesin úptep ketken. Osyndaı oqıǵa 16 tamyz kúni Bórli aýdanynda da boldy. Bul joly alaıaqtyń qarmaǵyna zeınetker iligip, ol 1 mln teńgesinen aıyrylǵan. Kúdikti áli ustalǵan joq.
