BQO-da alaıaq áıel páter alyp berem dep 13 adamnyń aqshasyn jymqyrǵan
ORAL. QazAqparat – Batys Qazaqstan oblysynda alaıaq 13 adamdy aldap, 5,5 mln teńgesin jymqyryp ketken, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, «Kontrafakt» jedel aldyn alý sharasy barysynda alaıaq áıeldiń Aqsaı qalasynyń 1977 jylǵy turǵyny ekeni belgili boldy.
Ol ınternet jelisi arqyly memlekettik baǵdarlamamen páter alyp beremin dep adamdardy aldaǵan. Osy qyzmeti úshin jábirlenýshilerden «Kaspi.kz» qosymshasy arqyly bank kartochkasyna 350 myń men 600 myń teńge kóleminde aqsha salýyn talap etken. Jalpy zalal kólemi 5,5 mln teńgeni quraıdy.
Qazirgi ýaqytta QR QK 190-babyna sáıkes qylmystyq is qozǵalyp, is sotqa joldandy.
Sol sekildi jumys izdep júrgen azamattar «Jumysqa ornalastyramyn» degen alaıaqtarǵa senip, tabys tappaq túgili, qolyndaǵy barynan aıyrylyp qalýda. Mysaly, Atyraý qalasynyń 25 jastaǵy turǵyny vahtalyq jumysqa ornalastyrmaq bolyp ár adamnan 30-35 myń teńgeden aqsha alyp, habarsyz ketken. Qazir buǵan qatysty QR QK 190-babyna sáıkes 5 epızod boıynsha tergeý amaldary júrgizilýde.
Aldanýdyń taǵy bir túri – aqshany qaryzǵa berip, qaıtaryp ala almaý.
Aıta keteıik, bıylǵy eki aıda oblysta 197 alaıaqtyq (ótken jyly osy merzimde – 196) qylmysy tirkelip otyr.
