BQO-da Alashordanyń 100 jyldyǵyna arnalǵan jyr músháırasy márege jetti

ORAL. QazAqparat - Búgin Qadyr Myrza Álı atyndaǵy mádenıet jáne óner ortalyǵynda Alashordanyń 100 jyldyǵyna jáne Jahansha Dosmuhamedovtiń qurmetine arnalǵan «Ulyqtaýǵa laıyq ult zııalysy» atty oblystyq jyr músháırasy márege jetti, dep habarlaıdy «QazAqparat» tilshisi.

BQO mádenıet, muraǵattar jáne qujattama basqarmasynyń qoldaýymen atalmysh ortalyq uıymdastyrǵan óleń báıgesine 16-30 jas aralyǵyndaǵy 14 aqyn qatysyp, baq synady. Olar bir óleńin Alash qozǵalysy men kóshbasshylaryna, ekinshisin Jahanshaǵa arnady.

 

Belgili aqyn, QR Jazýshylar odaǵy BQO fılıalynyń tóraıymy, QR eńbek sińirgen qaıratkeri Aqushtap Baqtygereeva bastaǵan qazylar alqasynyń uıǵarymymen Qyzylorda oblysynyń túlegi, M.Ótemisov atyndaǵy Batys Qazaqstan memlekettik ýnıversıtetiniń stýdenti Madııar Tóleýov bas júldeni jeńip aldy. Osy oqý ornynyń stýdentteri Janerke Ǵınaıat pen Márlen Ǵılymhan sáıkesinshe birinshi, ekinshi orynǵa ıe boldy. Syrym aýdandyq «Syrym eli» gazetiniń tilshisi Baýyrjan Shırmedınuly úshinshi júldeni enshiledi. Sondaı-aq Alshynbek Muqanǵalıev, Bekbolat Qalenov, Baýyrjan Zıneshev, Gúlnaz Patshaǵulova jáne Abzal Serikqalıulyna yntalantyrý syılyqtary tabys etildi.

Marapattaý rásimine qatysqan BQO mádenıet, muraǵattar jáne qujattama basqarmasynyń basshysy Dáýletkereı Qusaıynovtyń atap ótkenindeı, qazaqtyń «óz aldyna el bolǵanyn kóremiz be?», dep ańsap ótken Ǵumar Qarash syndy babalarymyzdyń armany oryndaldy. Táýelsizdik jolynda janyn qurban etip, bar ómirin sarp etken Alash arystary qandaı qurmetke de laıyqty. Sondyqtan olardyń eńbegin óleńmen aıshyqtaı bilý de - óner.

 

«Óleń - kıeli óner. Qazirgi tańda aqshasy barlar kitap shyǵaryp, jyrdyń qadirin ketirdi. Aqyndar jaıyna qaldy. Alaıda dúnıede bári ótkinshi, asyl sóz ǵana qalady keıinge. Bes ǵasyr boıy halqynyń muńyn jyrlap, týyn kótergen babalarymyzdyń baı murasy ólmek emes. Eń bastysy, ult egemendigi men erkindigin saqtaı bilý kerek. Elbasynyń «Rýhanı jańǵyrý» baǵdarlamasyna sáıkes sóz óneriniń ókilderi de ultty uıystyrý jolynda aldyńǵy shepte júrýi tıis», dedi aqyn Aqushtap Baqtygereeva.

 

Sondaı-aq osy kúni A.Baqtygereeva jas qalamger, aqyndarmen kezdesip, Prezıdent N.Nazarbaevtyń «Bolashaqqa baǵdar: rýhanı jańǵyrý» maqalasyna oraı atqarylar ister tóńireginde oı órbitti. Bes adamǵa Qazaqstan Jazýshylar odaǵy BQO bólimshesiniń qarjylaı syılyqtary tabys etildi.