BQO-da Alashorda úkimetiniń qurylǵanyna 105 jyl tolýyna oraı etnofestıval ótti
Alǵash ret uıymdastyrylǵan etnofestıvalǵa óńirdiń qala men aýdandarynan bólek, kórshiles Atyraý oblysynyń Qyzylqoǵa aýdanynan barlyǵy 12 komanda qatysyp, dástúrli ánshiler, aıtysker aqyndar men balýandar synǵa tústi.
Festıvaldi uıymdastyrýshylardyń sózine qaraǵanda, dalager – rýhy erkin, oıy azat, uly dalanyń ómirin, kásibin, ónerin tolyq ıgergen tulǵa. Etnofestıval dástúrli án, aıtys jáne qazaq kúresi boıynsha naǵyz myqtylardyń anyqtady. Balýandar, aqyndar, ánshi-termeshiler – dalagerler.
Aldymen 16 qanatty qos kıiz úıdiń aldynda Jympıty halyq teatrynyń mazmundy qoıylymy qoıyldy. Onda Alashtyń asyl isiniń jolynda jantalasqan Jahanshanyń, Haleldiń, atqa qonǵan Syrymnyń, aqyn Qadyrdyń boıaýly qanyq beıneleri kórinis tapty.
Aıta keteıik, Halel Dosmuhamedov 1883 jyly Qyzylqoǵada dúnıege kelgen.
Syrym aýdanynyń ákimi Tólegen Tóreǵalıev óńirdiń tarıhy men tanymal tulǵalaryna qatysty tanymdyq is-sharalardyń jyl boıy qolǵa alý josparlanyp otyrǵanyn jetkizdi. Bıyl – Alashorda úkimetniń qurylǵanyna – 105 jyl. Sondaı-aq Batys Alashorda basshysy Jahansha Dosmuhamedovtiń aınymas serigi bolǵan Halel Dosmuhamedovtiń týǵanyna 140 jyl tolyp otyr. Halel Alash qaıratkeri ǵana emes, ol Jympıty jerinde ǵylymı jáne saıası qyzmettermen aınalysty.
Festıval barysynda dástúrli ánshiler baıqaýynda syrymdyq Armat Aldamjarov top jarsa, qyzylqoǵalyq Ǵıbadat Turǵalıev ekinshi, qaratóbelik Nurshat Islamǵalıev úshinshi orynǵa ıe boldy.
Balýandar saıynda qyzylqoǵalyq Suńǵat Zakarııaev jeńis tuǵyryna kóterilse, syrymdyqtar Nurymjan Ǵabbasov pen Mereı Berdiǵalı qalǵan júldeli oryndardy bólisti.
«Syrym semseri» atty aqyndar aıtysynda terektilik Ádil Ahmetov pen kaztalovtyq Estemis Muhambetov taqyrypty ashýmen birge búgingi kúnniń ózekti máselelerin de kótere bildi. Sondaı-aq bókeıordalyq Jansaıa Mýsına men syrymdyq Baýyrjan Shırmedınulynyń saıysy da óte qyzý ótti.
Aıtys qorytyndysynda Á.Ahmetov bas júlde – «Syrym semserin» jeńip alsa, J.Mýsına birinshi, B.Shırmedınuly ekinshi, E.Muhambetov pen qyzylqoǵalyq Batyrjan Kádirbaı úshinshi orynnan kórindi.
Jalpykomandalyq esepte Syrym aýdany úzdik atansa, Qyzylqoǵa jáne Terekti aýdandary ekinshi jáne úshinshi orynǵa ıe boldy.
BQO mádenıet basqarmasynyń basshysy Saıran Dúısenov Halel Dosmuhamedovteı birtýar tulǵalarǵa arnalǵan is-sharalardyń budan keıin de oblys kóleminde jalǵasatynyn atap ótti.
«Syrymdaı dala danagóıiniń izi jarqyrap jatqan Syrym aýdany topyraǵynan talaı dúldúl túlep ushty. Olardyń arasynda aqyndar men batyrlar, sportshylar az emes. Sonymen qatar aýdan ortalyǵy – Jympıtyda Alashorda úkimeti ornap, onyń batys bólimshesi jumys jasaǵany belgili. Belgili jazýshy, Memlekettik syılyqtyń laýreaty Ánes Saraıdyń Alaashordanyń tabany – Torǵaı, ózegi – Semeı, julyny – Jympıty deýi tegin emes. Sondaı-aq Syrym aýdanynynyń perzenti, ataqty aqyn Qadyr Myrza Álı Jympıtyda «erkindiktiń táı-táı basqanyn» tebirene jyrǵa qosty. Atalmysh festıval aldaǵy ýaqytta da jalǵasyn tabady», dedi aqyn, Qadyr Myrza Álı atyndaǵy oblystyq mádenıet jáne óner ortalyǵynyń dırektory, Qazaqstan Jazýshylar odaǵy BQO fılıalynyń jáne qazylar alqasynyń tóraǵasy Baýyrjan Halıolla.
Foto: Aıjan Amangeldına
